Prishtinë, 12 janar - Sot, në ambientet e ministrisë për Forcën e Sigurisë së Kosovës(MFSK), filloi nga puna, me përkrahjen edhe të ekspertëve të specializuar për zhvillimin dhe shkrimin e doktrinave nga Qendra e armëve të kombinuara të Ushtrisë amerikane nga Fort Leavenworth, të Shteteve të Bashkuara të Amerikës(ShBA), James. F. Benn, zëvendës drejtor i drejtorisë për doktrinën e armëve të kombinuara  dhe Michael Scully oficer në të njëjtën drejtori.

Me këtë rast komandanti i FSK-së, gjenerallejtënant Kadri Kastrati i përshëndeti të gjithë të pranishmit, e në veçanti ekspertët amerikan të doktrinës, të cilët i përgëzoi për gatishmërinë që bashkërisht me oficerët e ministrisë dhe të FSK-së  kanë përgjegjësinë për të punuar në doktrinat për forcën e ardhshme.

Gjithashtu, gjeneral Kastrati theksoi rëndësinë e draftimit të doktrinës së përgjithshme  dhe atyre të fushave të caktuar duke shtuar se: ,,Doktrinat janë bazament për evoluimin e FSK-së në Forca të Armatosura dhe ministrisë për FSK në ministri të Mbrojtjes’’.

Në fund komandanti i FSK-së, gjenerallejtënant Kadri Kastrati duke iu drejtuar të gjithë anëtarëve të grupit punues për doktrinat u shpreh se pret një angazhim dhe rezultate të shkëlqyera nga kjo punë e përbashkët e oficerëve tanë dhe ekspertëve amerikan.

Punëtoria  e dytë për doktrinat do të zhvilloj punimet për katër ditë, nga sot deri me 16 janar 2014.  Në këtë cikël pritet që të hartohen doktrinat për fusha të caktuara.