Bernë, 29 janar - Policia e Aargaut në Zvicër ka arrestuar në Rothrist dy shqiptarë dhe tre irakianë, të dyshuar për tregti droge, transmeton Albinfo. Me këtë rast në një shtëpi është gjetur një sasi e madhe heroine.

Policët civilë patën përgjuar pjesëtarët e kësaj bande rreth stacionit hekurudhor në Rothrist. Njëri nga shpërndarësit madje i kishte ofruar heroinë policit.

Me këtë rast policia kishte arrestuar një shqiptar 23-vjeçar, i cili po qëndronte në Zvicër pa leje të rregullt qëndrimi.

Pas hetimeve në vazhdim, policia kantonale ka gjetur në afërsi shtëpinë ku banonte i arrestuari.

Policët kanë gjetur në atë shtëpi një tjetër shqiptar 27-vjeçar dhe tre irakianë. Me këtë rast në një kthinë përmes qenit policor është gjetur një sasi e madhe, e papërcaktuar e heroinës.

Policia ka arrestuar të gjithë personat e implikuar në këtë tregti, irakianë dhe shqiptarë.