Prishtinë, 8 prill - Qendra e Studimeve Universitare e Forcës së Sigurisë së Kosovës ka realizuar ushtrimin Fushor “ “Pëllumbi 2” në Zhegoc të Gjilanit.

Qëllimi i këtij ushtrimi ka qenë përgatitja taktike në operacionet urbane ofensive dhe mbrojtjes, si dhe testimi i gatishmërisë fizike dhe psikike të kadetëve.

Gjatë realizimit të ushtrimit fushor, “Pëllumbi 2” kadetët e QSU-së, u përballen edhe me temat tjera, si: Operacionet urbane ofensive dhe mbrojtëse, Evakuimi i të  lënduarve nga fushëbeteja 9 pikësha, Navigimi tokësor ditën dhe natën, Patrullimet, Reagimi në kontakt, etj. 

Për të përcjellë nga afër ushtrimin fushor të koduar me emrin “Pëllumbi 2” të kadetëve të Qendrës për Studime Universitare, ishin: atasheu ushtarak i Mbrojtjes së SHBA-ve, koloneli Chud Butts , komandanti i Komandës së Doktrinës dhe Stërvitjes (KDS) gjeneral brigade Enver Cikaqi, komandanti i Kampit Bondsteel, koloneli Clinton Backer dhe oficerë të lartë të FSK-së.

Me këtë rast, paraqitjen e kadetëve të FSK-së e vlerësuan lartë, koloneli Butts, gjenerali Cikaqi dhe komandanti i QSU-së, kapiten Avni Kiçina i cili pos tjerash tha se “është arritur tërësisht qëllimi dhe objektivat e ushtrimit për përgatitjen e kadetëve të QSU-së, para ushtrimit final vlerësues fushor, që do të mbahet në përfundim të vitit akademik”.

Ndërsa, komandanti i KDS-së, gjeneral Cikaqi dhe atashe ushtarak i Mbrojtjes i SHBA-ve, kolonel Butts u ndanë të kënaqur me përgatitjen dhe paraqitjen e shkëlqyeshme të kadetëve të FSK-së, gjatë mbajtjes të ushtrimit fushor “Pëllumbi 2”.

Koloneli amerikan Butts e vlerësoj lart angazhimin e instruktoreve dhe kadetëve të QSU-së, në punën e palodhshme për përgatitjen e oficerëve të FSK-së, në të ardhshmen.