Prishtinë, 19 mars - Inspektorati Policor i Kosovës ka bërë të ditur se në bashkëpunim me Drejtorinë për hetimin e trafikimit me qenie njerëzore të PK-së ka realizuar operacionin e koduar me emrin “Sinjali”.

Në konsultim me Prokurorinë Themelore në Ferizaj, Inspektorati Policor i Kosovës (IPK) ka filluar hetimet për këtë rast nga shtatori i 2014-ës.

Ky plan operativ është zbatuar sipas urdhëresave  të lëshuara nga gjykata themelore në Ferizaj  me ç’rast janë bastisur dhe kontrolluar pesë lokacione të ndryshme në Ferizaj, Fushë Kosovë dhe Prishtinë. Me këtë rast janë bastisur: një restaurant dhe një lokal i lojërave të fatit në Ferizaj, dy lokale banimi dhe objekte përcjellëse nga ku janë konfiskuar dëshmi të ndryshme materiale.

Në këtë operacion të IPK-së kanë marrë pjesë edhe njësi të specializuara të Policisë së Kosovës, Doganës së Kosovës dhe Administratës Tatimore të Kosovës.

Në IPK janë shoqëruar: një kapiten policor, një zyrtar policor, dy pjesëtarë të FSK-së, një sekretar i shkollës së mesme  teknike profesionale si dhe një profesor i shkollës së mesme në Drenas .

Personat e dyshuar janë intervistuar në prani të avokatëve mbrojtës dhe me vendim të prokurorit kompetent të njëjtëve u është caktuar masa e ndalimit policor për 48 orë me dyshimin se të njëjtit kanë kryer veprat penale: Zbulimi i fshehtësisë zyrtare, Keqpërdorimi i detyrës apo autoritetit zyrtarë, Marrja e ryshfetit, Ushtrim i ndikimit,  Dhënia e ryshfetit, Mbajtja në pronësi, kontroll ose posedim të paautorizuar të armëve,  Moslajmërimi i veprave penale apo kryesve të tyre dhe Dhënia e ndihmës kryesve pas kryerjes së veprave penale. 

IPK garanton qytetarët e vendit dhe institucionet se do të vazhdojë të bashkëpunojë me çdo institucion të zbatimit të ligjit në Kosovë dhe do të kontribuojë në profesionalizmin, humanizmin, objektivitetin dhe llogaridhënien edhe më të madhe të policisë sonë, si një ndër policitë më të mira në rajon.