Identifikohen dy viktima të kontrabandimit me migrantë
Dy personat e ndaluar kanë ardhur në drejtim të kufirit në cilësi të këmbësorëve dhe të njëjtit pasi nuk kanë arritur të bindin zyrtarin policor në kufi lidhur me lëvizjen (udhëtimin) e tyre dhe destinacionin, të njëjtit janë dërguar në vijën e dytë të kontrollit ku janë intervistuar dhe nga deklarimet e tyre është kuptuar se janë nisur për në vendet e Bashkimit Evropian.
Gjatë procesit të intervistimit, gjithashtu është kuptuar se ata janë viktima të kontrabandimit, pasi që të njëjtit paraprakisht ishin marrë vesh që në kompensim me të holla 2000 euro, respektivisht 2600 euro para të cilat kanë pasur t’ia paguajnë të dyshuarit mashkull kosovar S. Sh i cili është në kërkim nga policia.
Bazuar në hetimet preliminare policore i dyshuari paraprakisht në shtëpinë e tij kishte pranuar në avans shumën e të hollave (300 euro), ndërsa pjesën tjetër të parave (1700 euro) do t’i merrte kur viktimat të arrinin në destinacionin e caktuar (vend i BE-së).
Të dy viktimave u është refuzuar dalja jashtë shtetit pasi nuk i plotësojnë kushtet për të udhëtuar në vendet e BE-së dhe janë kthyer prapa në vendbanimet e tyre. Për rastin është njoftuar prokurori kompetent dhe të gjitha veprimet policore janë kryer në konsultim dhe me autorizim të tij.
