Prishtinë, 21 mars - Trupi gjykues në rastin ‘Kleçka’ ka marrë vendim që deklaratat dhe ditarët e Agim Zogajt, i njohur si Dëshmitari X, janë të papranueshme.

Këtë vendim e ka marrë trupi gjykues, i përbërë nga dy gjykatës të EULEX-it dhe një gjykatës vendas.

Gjykatësit kanë vlerësuar se prokuroria nuk i ka përmbushur disa standarde të caktuara procedurale, dhe për këtë arsye dëshmia e Agim Zogajt është e papranueshme. 

Deklaratat e X-it dhe ditarët e tij në rastin Limaj, sot janë shpallur si si prova të papranueshme për Gjykatën dhe se tani po diskutohet si të vazhdoj procesi.

Gjykatësi i lëndës, e ka dhënë një arsyetim për këtë aktvendim, që sipas tij nuk ngritët aktakuzë vetëm nga një dëshmitar, që ka qenë vetë i dyshuar.

Sipas gjykatësit, po të ishte gjallë “Agim Zogaj ne do ta ftonim për të dhënë edhe personalisht dëshminë e tij”.

Arsyetimi për hedhjen poshtë të kësaj dëshmia përmban 29 faqe.

Shqyrtimin e pranueshmërisë së deklaratave të dëshmitarit “X” e kishte kërkuar pala mbrojtëse, për shkak të gjendjes psiqike të tij, në kohën e dhënies së dëshmisë dhe po ashtu edhe ekspertizës së grafologjisë.

Ekipeve të prokurorisë dhe të mbrojtjes u është kërkuar që t’i paraqesin deklaratat e tyre përfundimtare përpara se të nxiret aktgjykimi për këtë rast.

Në ndërkohë, gjykatësi kryesues ka urdhëruar lirimin e të pandehurve nga paraburgimi. Mbrojtja dhe prokuroria do të kenë të drejtën e ankesës pasi të shpallet aktgjykimi.

Seanca do të vazhdoj, por ende nuk dihet se si do të procedohet më tutje ky proces.