Hagë, 19 gusht - Pritet të vijojë edhe sot në Gjykatën për Krime të Luftës në Hagë, rigjykimi kundër ish kryeministrit të Kosovës, Ramush Haradinaj, dhe ish pjesëtarëve të UÇK-së, Idriz Balaj dhe Lah Brahimaj.

Në rigjykimin e pjesshëm që filloi ditën e djeshme do të trajtohen akuzat për vrasje, trajtim mizor dhe torturim të të burgosurve në shtabin e ish Ushtrisë Çlirimtare të Kosovës në fshatin Jabllanicë në Kosovën perëndimore.

Në seancën e djeshme Prokurori Paul Rogjers deklaroi se të tre të akuzuarit ishin përfshirë në tortura dhe vrasje.

Sipas tij ndërsa UÇK-ja ishte e angazhuar në luftë legjitime për pavarësi në vitet 1998-1999, ku kishte të drejtë të përdorë forcën, fushata e torturës dhe e vrasjes ndaj civilëve që janë parë si kundërshtarë, ishte ilegale.

Gjithashtu ditën e djeshme u arrestuar edhe dëshmitari kyç i çështjes, Shefqet Kabashi i cili refuzoi të dëshmonte në procesin e parë. Avokati i Haradinaj, Ben Emerson, deklaroi në Gjykatë se prokurorët duhet të thërrisnin Kabashin për të dëshmuar në seancën e sotme, por mbetet e paqartë nëse ai do t`u përgjigjet pyetjeve.

Ndërkohë më 21 korrik të vitit të kaluar, Gjykata ndërkombëtare për krime të luftës në ish Jugosllavi, urdhëroi rigjykimin e ish kryeministrit të Kosovës, Ramush Haradinaj dhe dy ish bashkëluftëtarëve të tij të akuzuar për krime lufte.

Dhoma e Apelit e Gjykatës së Hagës, anuloi pjesërisht vendimin e Gjykatës të prillit të vitit 2008 e cila e kishte shpallur të pafajshëm zotin Haradinaj. Gjykata kishte pranuar ankesën e Prokurorisë e cila ka pohuar se nuk i ishte dhënë kohë e mjaftueshme për t`i shfrytëzuar të gjitha rrugët, në mënyrë që të sigurojë paraqitjen e dy dëshmitarëve kryesor të rastit.

Ramush Hardinaj, kryetar i Aleancës për Ardhmërinë e Kosovës, dha dorëheqjen nga posti i kryeministrit të vendit më 8 mars të vitit 2005 për t`u dorëzuar vullnetarisht në gjykatën e Hagës, prokuroria e së cilës e akuzonte atë dhe dy bashkëluftëtarët e tij Idriz Balaj e Lahi Brahimaj për krime lufte. Akuzat lidheshin me veprimtarinë e Haradinaj gjatë luftës kur ai ishte një nga komandantet e lartë të ish Ushtrisë Çlirimtare të Kosovës.

Procesi kundër zotit Haradinaj filloi më 5 mars të vitit 2007 dhe përfundoi në prill të vitit 2008 me pafajësinë e tij dhe Idriz Balajt. I pandehuri tjetër Lahi Brahimaj u dënua me gjashtë vjet heqje lirie nën akuzat për siç thuhet trajtim mizor dhe torturë.