Prishtinë, 3 janar - Në Kosovë, sistemi gjyqësor vazhdon të përballet me numër të madh lëndësh të pazgjidhura por edhe me numër të vogël të gjykatësve dhe prokurorëve.

Kryetari i Këshillit Gjyqësor Enver Peci, thotë për Zërin e Amerikës se reforma e filluar në këtë sistem do të krijojë mundësi për tejkalimin e sfidave.

Ai thotë se sistemi i drejtësisë do të mbetet unik në tërë territorin e Kosovës, për fshirë edhe veriun e saj të banuar me shumicë serbe.

Peci shprehet i bindur ndërkaq se gjyqësori është i gatshëm të marrë përgjegjësi të reja nga misioni i EULEX-it, por pa përjashtuar ndihmën e këtij misioni në rastet që kanë të bëjnë me krimet e luftës.