Prishtinë, 2 korrik - Ministri i Forcës së Sigurisë të Kosovës(FSK), Agim Çeku dhe komandanti i FSK-së gjenerallejtënant Kadri Kastrati, pritën  në takime të ndara, Komandantin e Gardës Kombëtare të Aiovës, gjeneral major Timoty Orr, me bashkëpunëtorë, si dhe Atasheun Ushtarak të SHBA-ve në Prishtinë, kolonel James Kott.

Ministri dhe komandanti i FSK-së, fillimisht e falënderuan gjeneralin Orr, për ndihmën e madhe që po jep SHBA-ja dhe Garda Kombëtare e Aiovës, në ngritjen profesionale të FSK-së.

Ministri i FSK-së Agim  Çeku dhe komandanti i Gardës Kombëtare të Aiovës, biseduan edhe për bashkëpunimi  e mëtejmë në mes të dy institucioneve; Gardës Kombëtare të Aioves dhe FSK-së, për veprimet konkrete  si  dhe zgjerimin e  programit të partneritetit edhe në fusha tjera, në konceptin \"Tërë Aiova për Tërë Kosovën\", si dhe  thellimin e bashkëpunimit  në të ardhmen dhe  kontributi i stafit të Aioves përmes  Ambasadës Amerikane dhe përfaqësuesve të tyre, që  janë pjesë të NAT-it.

Ndërsa, komandanti i FSK-së, gjeneral Kastrati, e njoftoj gjeneral Orrin, me të arriturat e përgjithshme të FSK-së, me theks të veçantë, pjesëmarrjen në ushtrimet rajonale, të mbajtura në Shqipëri dhe Maqedoni, për Rishikimin e Sektorit Strategjik të Sigurisë si dhe për marrëveshjet e bashkëpunimit, siç, është SOFA.

Në fund, komandanti i Gardës Kombëtare të Aiovës, gjeneral major Timoty Orr, shprehu gatishmërinë që edhe në të ardhmen, do ta ndihmojnë FSK-në.