Prishtinë, 1 nëntor - Sot në ambientet e kazermës  “Minatori” të Batalionit të III-të të Brigadës për Reagim të Shpejtë të FSK-së në Mitrovicë, komandanti i FSK-së, gjenerallejtënant Rrahman Rama së bashku me zëvendës komandantin e Komandës së Forcave Tokësore (KFT) gjeneral brigade Gëzim Hazrrollin, komandantin e BRSH-së, kolonel Xhevahir Gecin dhe komandantin e Batalionit të III-të, nënkolonel Sylejman Caka, pritën në një takim zyrtar kryetarin e Kuvendit të Republikës së Kosovës, Kadri Veselin me bashkëpunëtorë.

Me këtë rast, komandanti i FSK-së, gjeneral Rama pasi i dëshiroi mirëseardhje kryetarit të Kuvendit të Kosovës, z. Veseli në Batalionin e III-të të BRSH-së, e njoftoi atë me të arriturat e përgjithshme të FSK-së, bashkëpunimin rajonal dhe ndërkombëtar e sidomos bashkëpunimin me Ushtrinë Amerikane, Gardën Kombëtare të Ajovës, KFOR-in etj. Gjithashtu gjeneral Rama e njoftoi z. Veseli edhe me pjesëmarrjen e FSK-së, në ushtrimet ndërkombëtare, në veçanti theksoi suksesin e njësitit të FSK-së, që në Britaninë e Madhe mori medaljen e artë, në mesin e dhjetëra ekipeve pjesëmarrës.

Komandanti i FSK-së, gjeneral Rama e njoftoi kryetarin Veseli edhe me shkollim e pjesëtarëve të FSK-së, në qendrat më të mëdha ushtarake botërore, si në SHBA, Gjermania, Mbretërinë e Bashkuar, Turqi, Kroaci, Maqedoni, Shqipëri etj, si dhe për pjesëmarrjen në ushtrimet në shumë vende të rajonit duke arritur rezultate kulmore, falë angazhimit, motivimit dhe profesionalizimit të FSK-së.

Gjeneral Rama, në fund të fjalës së tij, u ndal te ushtrimi fushor “Shqiponja 5”, që ishte njëri ndër ushtrimet më të suksesshme të FSK-së. Në ushtrimin fushor “Shqiponja 5” kanë marrë pjesë edhe ushtria amerikane për Evropë, Garda Kombëtare e Ajovës, Policia e Kosovës dhe organizatat emergjente të Kosovës, si kryqi i kuq, etj. Ushtrimin kanë përcjellë edhe vëzhgues ushtarakë nga shtet e rajonit si nga Shqipëria, Maqedonia, Sllovenia, Kroacia etj.

Ndërsa për të arriturat e Brigadës për Reagim të Shpejtë të FSK-së, kryetarin Veseli e informoi komandanti i saj, kolonel Xhevahir Geci dhe shefi i Shtabit të BRSH-së, nënkolonel Ejup Maqedonci.

Gjatë vizitës të njësitit të FSK-së, që ditë më parë, kishte zënë vendin e parë në ushtrimin “Cambrian Patroll 2016”në Britaninë e Madhe, kryetari i Kuvendit, Veseli përgëzoi komandantin e FSK-së, dhe të gjithë pjesëtarët e FSK-së, për suksesin e arritur ndërkombëtar.

Ai duke u ndërlidhur me suksesin e FSK-së në Britaninë e Madhe tha se shpreh emocionin  tim për sukseset e FSK-së. Të gjithë jemi krenarë për këtë sukses dhe se FSK-ja është institucioni më i përgjegjshëm dhe më i suksesshëm që duhet të jetë shembull në nivel vendi.

\"FSK-ja i ka arritur t’i plotësoi standardet më të larta profesionale dhe është kontribuese e madhe për paqen në përgjithësi në rajon.\"

\"FSK-ja është gati të bëhet ushtri e Kosovës dhe element i domosdoshëm me arkitekturën e sigurisë rajonale dhe globale, tha kryetari i Kuvendit, para oficerëve dhe ushtarëvet rë FSK-së, në Mitrovicë.

Në fund të vizitës, për mysafirët u shfaqë dokumentari nga pjesëmarrja e pjesëtarëve të FSK-së, në ushtrimin fushor Cambrian Patroll 2016, në Britani të Madhe, përgatitur nga udhëheqja e skuadrës toger Manushaqe Nura, e cila e njoftoi kryeparlamentarin për ecurinë e ushtrimit dhe rëndësinë e tij për FSK-në.

Zoti Veseli duke iu drejtuar ushtarëve dhe ekipit që zuri vendin e parë në ushtrimin fushor “Cambrian Patroll 2016”, ku ekipi i FSK-së, është stolisuar me medalejne e artë, u shpreh se Ushtria e Kosovës është element i domosdoshëm për sigurinë rajonale dhe globale.