Mitrovicë, 20 korrik - Komuna e Mitrovicës dhe Batalioni III për Reagim të Shpejtë i FSK-së që vepron në rajonin e Mitrovicës, do të bashkëpunojnë ngushtë në interes të qytetarëve.

Për këtë u dakorduan kryetari i komunës, Avni Kastrati dhe komandanti i këtij batalioni, nënkolonel. Arsim Shaqiri, të cilët zhvilluan të premten një takim të përbashkët në ambientet e komunës.

Kryetari Kastrati, ka çmuar avancimin profesional të FSK-së dhe gatishmërinë e saj për të qenë në krye të obligimeve.

“Rrita, zhvillimi dhe profesionalizimi i  FSK-së paraqet një perspektivë të sigurt për vendin tonë”.

Ai theksoi se komuna ka qenë dhe është e gatshme të vazhdoj dhe intensifikoj bashkëpunimin me FSK-në në të mirë të qytetarëve.

Në këtë kontekst, veçoi sidomos nevojën për mbështetje në raste emergjente nga FSK-ja që ka kapacitete dhe përvojë të duhur.

Ndërsa, komandanti i këtij batalioni, nënkolonel. Arsim Shaqiri, pasi falënderoi kryetarin për mbështetjen, foli për punën profesionale në zhvillimin e FSK-së.

Ai tha se është bërë një punë shumë e madhe në përgatitjen e kuadrove, të cilat paraqesin shtyllën më të fortë të kësaj trupe.

Ai konfirmoi gatishmërinë e FSK-së për ndihmë komunës në raste emergjente.