Prishtinë, 7 dhjetor - Pjesëtarët e Kompanisë së Deminimit(KD)  të Regjimentit të Mbrojtjes Civile  të Forcës së Sigurisë së Kosovës filluan sot ligjëratat  për vetëdijesimin e përdorimit të  mjeteve  piroteknike para nxënësve  të  Gjimnazit  “ Sami Frashëri ”  në Prishtinë.

Përgjegjësi i ekipit të instruktorëve rreshter Afrim Qusaj nga Kompania e Deminimit  u  shpreh mjaft i kënaqur  me  interesimin e  treguar gjatë këtyre  ligjëratave “ Ligjëratat e tilla për vetëdijesimin  e përdorimit të mjeteve piroteknike, të mbajtura në një numër të madh të shkollave në Kosovë, kanë rezultuar  me një  efekt  mjaft  pozitiv  ne vendin tonë, duke u bazuar në të dhënat  dhe statistikat  që bëhet fjalë për lëndimet e shkaktuara  nga këto mjete, ku  mundë të theksohet se nga viti  në vit ka  më pak raste të raportuara  se sa vitet e kaluara dhe e gjithë kjo falë punës për vetëdijesimin e përdorimit të këtyre  mjeteve ”.

Ndërsa Drejtori i Gjimnazit “ Sami Frashri ” drejtimi Shoqëroro Gjuhësor  z. Ilmi Reçica falënderoi pjesëtarët  e FSK-së për këtë iniciative mjaft të qëlluar “ Falënderoj pjesëtarët e Forcës së Sigurisë së Kosovës  për këtë ligjërate  më se të nevojshme për të mirën e nxënësve tanë në menaxhimin e mjeteve  piroteknike në këtë  fund vit ku festat janë të njëpasnjëshme,  gjithashtu shpresoj që këto informacione të  fituara gjatë këtyre ligjëratave  nxënësit tanë do i përcjellin edhe tek familjaret e tyre dhe tek nxënësit të cilët aktualisht nuk janë prezent”.

Ky është viti i shtatë që  Departamenti i Bashkëpunimit Civilo Ushtarak  i Ministrisë së  Forcës së Sigurisë së Kosovës   në bashkëpunim me Ministrinë e Arsimit  planifikon  këtë aktivitet  për t’i vetëdijesuar të rinjtë e vendit tonë për përdorimin e mjeteve të tilla në prag të festave të fund vitit.

Këto ligjërata të cilat kanë filluar sot  do realizohen në shtatë komuna të ndryshme të Kosovës dhe pritet   të përfundojnë  me  përfundimin e gjysmë vjetorit  të parë  kur edhe fillojnë  festat e fund vitit  .