Prishtinë, 24 dhjetor - Në Ministrinë për Forcën e Sigurisë të Kosovës (MFSK) sot u mbajt konferenca e fund vitit për media. Në Konferencë morën pjesë ministri i MFSK-së, Haki Demolli, Komandanti i FSK-së gjenerallejtënant Rrahman Rama, zëvendësministrat Fadil Gashi, Muhamet Latifi, Sekretari i Përgjithshëm Shkëlzen Sylaj, drejtori i Ekipit Këshillues Ndërlidhës të NATO-s (NLAT) gjeneral brigade Stefan Fix, oficerë dhe zyrtarë të lartë të MFSK-së, FSK-së, përfaqësues të Ekipit Këshillues te NATO-s (NAT) dhe NLAT-it, dhe gazetarë të mediumeve të Kosovës.

Ministri i FSK-së, Demolli me këtë rast, i përshëndeti dhe falënderoi përfaqësuesit e mediave për përcjelljen korrekte dhe në mënyrë profesionale të aktiviteteve të FSK-së. Në fjalën e tij, Ministri Demolli u ndal te numërimi i  Objektivave  dhe prioriteteve strategjike për këtë vit, të Ministrisë dhe të Forcës së Sigurisë së Kosovës.

 Si objektiv i parë, është ngritja dhe ndërtimi i Ministrisë së Mbrojtjes dhe Forcave të Armatosura të Kosovës, në bazë të rekomandimeve të dala nga Rishikimi i Strategjisë të Sektorit të Sigurisë të Kosovës.

Objektivi i dytë, është hartimi dhe aprovimi i Pakos ligjore dhe dokumenteve strategjike të Mbrojtjes.   

Objektivi i tretë, është intensifikimi dhe sforcimi i bashkëpunimit bilateral me Forcat e Armatosura të SHBA-ve, vendeve të tjera të rajonit, NATO-n dhe BE-në.

Objektivi i katërt, pjesëmarrja aktive dhe kontributi substancial në ndërtimin e stabilitetit dhe bashkëpunimit rajonal.

Objektivi i pestë, pjesëmarrja aktive dhe kontributi substancial në vendosjen e raporteve formale të bashkëpunimit të Republikës së Kosovës me NATO-n dhe BE-në.

Ministri Demolli një rëndësie të veçantë i kushtoi bashkëpunimin me KFOR-in, të cilin e falënderoi për kontributin e dhënë në sigurisë e vendit.

Ai foli edhe për bashkëpunimin bilateral me NATO-n, KFOR-in, SHBA-të, si dhe shtetet tjera, sidomos theksoi bashkëpunimin e shkëlqyeshëm me Gradën Kombëtare të Ajovës, (SHBA). 

Në këtë takim në mënyrë të veçantë, Ministri Demolli theksoi punën e madhe që është bërë në kursimin e shpenzimeve të vetë Kabinetit të Ministrit, Ministrisë dhe Forcës së Sigurisë. Me shifra të sakta, Ai u shpreh se në raport me shpenzimet e Kabinetit paraprak me vitin e kaluar, Kabineti i Ministrit ka bërë më pakë shpenzime për 81.000 euro, kurse në nivel të Ministrisë dhe FSK-së janë bërë kursime deri në 701000 euro më pak se një vit më parë.

Ne fjalën e tij Ministri Demolli  posaçërisht falënderoi NATO-n, dhe mekanizmat e saj; NAT-in dhe NLAT-it, të cilët janë drejtpërdrejt të ndërlidhur në Ministrinë e FSK-së dhe FSK-në.

Një rëndësi të veçantë Ministri i kushtoi shkollimit te suksesshëm  të kadetëve dhe pjesëtarëve të FSK-së, në SHBA, Gjermani, Britani të Madhe, Kroacia, Maqedoni, Turqi etj.      

Ministri foli edhe për pjesëmarrjen në Konferencat ndërkombëtare dhe rajonale të Sigurisë, ku potencoi vizitat shumë të rëndësishme që zhvilloi në Bruksel dhe pjesëmarrjen në konferencat ndërkombëtare me karakter të sigurisë.

Demolli falënderoi edhe të gjitha shtetet që po e ndihmojnë FSK-së, me donacione e në veçanti Shtetet e Bashkuara të Amerikës.

Po ashtu, me këtë rast ministri shprehu falënderimin dhe kënaqësinë për vlerësimin e lartë që është nga publiku i gjerë, në vlerësimet e opinionit publik të bëra nga tri OJQ-të kredi bile ku FSK-ja dhe MFK-ja, kanë dalë si institucionet më besueshme të vendit. Në fund, për sukseset e arritura, ministri falënderoi të gjithë pjesëtarët e FSK-së nga niveli i ushtarit e deri te komandanti si dhe personelin e MFSK-së.

Gjatë konferencës për media, gazetarët parashtruan shumë pyetje që kishin të bënin me transformimin e FSK-së dhe sfidat. Ministri Demolli fjalën e tij para gazetarëve e përmbylli me konstatimin: “Ne jemi gati për misionin e ri, ne jemi gati për përgjegjësi të reja\".