Prishtinë, 5 mars - Ministri i Punëve të Brendshme z.Zenun Pajaziti po merr pjesë në Konferencën Ministrore mbi Bashkëpunimin në Fushën e Sigurisë së Kufijëve në Europën Juglindore.

Konferenca po zhvillon punimet në Tiranë nën Kryesimin e Presidencës Spanjolle të Bashkimit Europian. Punimet e kësaj Konference i përshëndeti me një fjalë rasti Kryeministri i Republikës së Shqipërisë z.Sali Berisha.
 
Në këtë Konferencë po marrin pjesë Ministrat e Punëve të Brendshme të vendeve të Europës Juglindore, përfaqësues të Bashkimit Europian, përfaqësues të organizatave ndërkombëtare si OSBE, DCAF, FRONTEX, IOM, ICMPD etj.
 
Ministri Pajaziti në fjalën e tij para të pranishmëve prezentoi për progresin e arritur në kontrollin dhe menaxhimin e kufijëve shtetëror, duke shprehur njëherazi gatishmërinë e Republikës së Kosovës për të qenë partner me vendet tjera të rajonit në drejtim të kontrollit efikas të kufijëve shtetëror si një ndër parakushtet kryesore për procesin e përafrimit dhe anëtarsimit të vendeve të Ballkanit Perendimor në Bashkimin Europian.
 
Në fund të Konferencës u miratua edhe Deklarata Ministrore që riafirmon përkushtimin e vendeve të rajonit për të bashkëpunuar në fushën e sigurisë së kufijëve në Europën Juglindore.