Mitrovicë, 14 gusht - U hoqën të gjitha dilemat. Ashtu sikur që ishte paralajmëruar, të dielën në ora 10:00, filluan punimet për rivitilzimin e urës kryesore mbi lumin Ibër, projekt ky i financuar nga BE-ja, realizuar sipas marrëveshjes së arritur në Bruksel.

Fillimisht kompania “Jehona”, e kontraktuar për largimin e barrikadës, largoi rrethojat në cepin jugor të urës, për të fillua më pastaj punën ekskavatorët dhe kamionët për largimin e pishave të mbjella dhe dheut të vendosur nga serbët në cepin verior të urës.

Fillimin e punëve e përcolli nga afër kryetari i komunës, Agim Bahtiri, ndërsa që qindra qytetarë dhe një numër i madh i medieve ndodheshin aty për tu bindur në fillimin e punëve për rivitalizimin e urës. Fillimi i punëve u mirëprit nga qytetarët dhe me këtë rast nuk pati as më të voglin problem.

Kryetari Bahtiri u shpreh të jetë i lumtur për fillimin e punëve për  rivitalizimit e urës, duke e quajtur ditën e sotme si një ditë të mirë për qytetarët e të dyja pjesëve të qytetit të Mitrovicës.

“Sot është një ditë e mirë për të gjithë qytetarët e Mitrovicës, pavarësisht përkatësisë së tyre etnike. Siç po shihni, erdhi  radha që barrikada të largohet, sepse ura nuk është vend i barrikadave, por shërben për ofrimin e njerëzve. Menjëherë pas largimit të barrikadës dhe pastrimit të urës, do të filloj rivitalizimi i gjithë urës, për të bërë të mundshëm bashkimin e qytetit dhe të qytetarëve, që ata të lëvizin e qarkullojnë lirshëm, bashkë me automjetet dhe mallrat e tyre. Dhe kjo do të ndodhë në janar të vitit të ardhshëm, kur është afati për kryerjen e punëve”, tha ai.

Kryetari Bahtiri natyrisht se nuk harroj t’i falënderoj të gjithë qytetarët e Mitrovicës, të veriut dhe të jugut, për të cilët tha se me sjelljet dhe maturinë e tyre kanë krijuar stabilitet në qytetin e Mitrovicës.
 
“Natyrisht se  nuk është harruar as rindërtimi i xhamisë  që ka ekzistuar këtu në cepin verior të urës. Ne kemi konstatuar në Bruksel se vendi ku ka qenë  xhamia është pronë e Bashkësisë Islame dhe xhamia do të fillojë së ndërtuari aty në një kohë të përshtatshme jo të largët”, ka thënë Bahtiri.
 
 Qytetarët që kishin ardhur për të përcjellë fillimin e punëve, të qetë dhe të gëzuar, uruan kryetarin e komunës, Agim Bahtiri, për siç thanë angazhimin dhe përkushtimin e tij për të liruar urën për lëvizje e qarkullim të lirë, ani pse kjo ishte në përgjegjësi të tjerëve.

“Ju zoti kryetar keni kërkuar vazhdimisht nga BE-ja që ura të lirohet, andaj edhe keni merita të mëdha për këtë. Ne urojmë që punët të shkojnë mbarë dhe të mos lindin në ndërkohë probleme. Ju e keni mbështetjen tonë sepse tek ju kemi vërejtur përkushtimin serioz e të vazhdueshëm për hapjen e urës”, i thanë disa qytetarë kryetarit Bahtiri.

Ndërsa kryetari Bahtiri, pasi i uroi qytetarët, tha se meritat më të mëdha për këtë që po ndodhë sot i kanë ata. “Ju keni treguar maturi, syçeltësi dhe durim, gjë që kanë sjellë deri këtu. Prandaj meritat më të mëdha i keni ju për këtë, por edhe për stabilizimin e gjendjes së përgjithshme në të dyja pjesët e qytetit. Ju më keni mbështet në të gjitha aktivitetet që i kam  zhvillua për të mirën tuaj dhe të qytetit. Natyrisht se meritat e veta i kanë edhe institucionet tjera të vendit dhe ato ndërkombëtare, pa të cilat kjo ngjarje e stome nuk do të ndodhte”, ju tha qytetarëve kryetari Bahtiri.