Prishtinë, 23 dhjetor - Ministri i Drejtësisë, Hajredin Kuçi, priti sot në takim Shefin e EULEX-it, Gabriele Meucci, me ç’rast ky i fundit e përgëzoi Ministrin Kuçi për mandatin e ri në detyrën e Ministrit të Drejtësisë.

Gjatë këtij takimi, Ministri Kuçi dhe Shefi i EULEX-it, Meucci diskutuan për zhvillimet e fundit në Kosovë, konkretisht në sistemin e drejtësisë. Vëmendje i është kushtuar reformave në infrastrukturën ligjore, bashkëpunimin e mëtutjeshëm në mes të institucioneve të Kosovës dhe EULEX-it si dhe bashkërendimin e aktiviteteve,  procesin e liberalizimit të vizave dhe pallatin e drejtësisë.

Ministri Kuçi theksoi se, gjatë këtij mandati fokusi qendrorë do të jetë në ngritjen e efikasitetit të gjyqësorit dhe çështjet civile, andaj është e rëndësishme që të ketë bashkëpunim dhe koordinim në të gjitha fushat e drejtësisë me institucionet përkatëse dhe EULEX-in.

Edhe Shefi i ri i EULEX-it, Meucci, është shprehur i kënaqur për bashkëpunimin e shkëlqyer që ka pasur EULEX me Ministrinë e Drejtësisë.

Ai ka thënë se është e rëndësishme që bashkëpunimi të vazhdojë edhe më tutje me qëllim të forcimit të mëtutjeshëm të sundimit të Ligjit në Kosovë.

Në fund të takimit, palët u pajtuan për vazhdimin e punës së Bordit të Përbashkët Koordinues për Sundimin e Ligjit dhe përgatitjet për Dialogun e Strukturuar me BE, si aktivitete të rregullta ndër institucionale.