Prishtinë, 18 nëntor - Në gjykim për krime lufte të “Grupit Drenica”, “Dëshmitari D” tregoi se në verën e vitit 1998 ndodhej në odën e Lushtakëve në Prekaz, ndërsa aty sipas tij u soll Idriz Rreci, kryetari i LDK-së për Skenderaj për t’u marrë në pyetje.

“Dëshmitari D” tregoi se nga një ushtar i UÇK-së, teksa qëndronte në odën e Sami Lushtakut është pyetur se ku jetonte Idriz Rreci.

“Në verën e vitit 1998 unë isha në Prekaz te Sami Lushtaku në odën e Lushtakëve. Aty erdhën edhe disa ushtarë tjerë të UÇK-së, edhe kanë pyetur se ku jeton Idriz Rreci. Unë ju kam shpjeguar se ku jeton, kanë shkuar dy persona e kanë marrë dhe e kanë sjellë Idriz Rrecin në odë”, tha dëshmitari.

Ai më pas i tregoi kryetarit të trupit gjykues Darius Silickit se çfarë i kërkoi Lushtaku Rrecit.

“Duhet shkollat me i mbyll menjëherë, shko thuaj atij [Ibrahim Rugovës] se nëse nuk e bën këtë punë kemi me të vra”, tha dëshmitari t’i ketë thënë Lushtaku Rrecit.

Idriz Rrecaj ishte kryetar i Lidhjes Demokratike të Kosovës për Skenderaj në atë kohë.

Sipas “Dëshmitarit D” Rreci është pyetur më pas nga Lushtaku se pse po e pengon luftën.

“D-ja”tha se Rreci i ka thënë Lushtakut se po e bën pikërisht të kundërtën.

“Luftën unë nuk jam duke e penguar, unë jam duke e përkrahur. Unë kam qenë ushtar i Jugosllavisë dhe atje kam mbajt pushkë-mitraloz dhe nëse ma siguroni një të tillë edhe unë kam me luftu përkrah jush. Ndërsa sa i përket mbylljes së shkollave, unë ato i mbylli vetëm në rast se ma kërkon Ibrahim Rugova”, tregoi dëshmitari përgjigjen e Rrecit për Lushtakun, transmeton kallo.com

Dëshmitari shtoi në gjykatore se pas kësaj bisede gjendja në odë u tensionua dhe takimi përfundoi.

Idriz Rreci ende ndodhet në mesin e të zhdukurve.

Para se dëshmitari t’u përgjigjej pyetjeve të kryetarit të trupit gjykues Darius Silickit për kreun e LDK-së në Skenderaj, pyetje për Idriz Rrecin i shtroi “D-së” edhe Gregory Guy Smith, avokat i Sylejman Selimit.

S’ith e pyeti dëshmitarin nëse Rreci ka qenë ushtar i UÇK-së, duke i kërkuar përgjigje të shkurtër me fjalët po, ose jo.

“Nuk mund të përgjigjem në këtë formë. Ti nuk po më len me elaboru”, tha dëshmitari.

Pasi e pyeti dëshmitarin edhe për disa persona se a i njihte dhe a kanë qenë anëtarë të LDK-së duke marrë përgjigjen nga “D-ja” se “disa i njihte e disa jo”, Gregory Guy Smith përfundoi marrjen në pyetje të këtij dëshmitari ë mbrojtur. Seanca është duke vazhduar.

/kallo.com/