Prishtinë, 4 shtator - Ministri i FSK-së Agim Çeku së bashku me komandantin e FSK-së gjenerallejtënant Kadri Kastratin, sot pritën atasheun e ambasadës së Republikës së Shqipërisë në Kosovë kolonel Fiqri Hoxha. Atasheu Hoxha në këtë takim shoqërohej nga ambasadori i Republikës së Shqipërisë në Kosovë Islam Lauka.

Ministri dhe Komandanti i FSK-së i uruan  mirëseardhje  atasheut Hoxha, duke çmuar lartë bashkëpunimin e deritashëm me  Ministrin e Mbrojtjes të Shqipërisë dhe Ushtrinë e Shqipërisë.

Me këtë rast ministri  dhe komandanti i FSK-së shprehen gatishmërinë e tyre për të  thelluar dhe intensifikuar bashkëpunimin, duke ofruar mundësi dhe vullnet për bashkëpunim në  të gjitha fushat me interes të përbashkët.

Ministri Çeku e informoi atasheun Hoxha edhe me proceset aktuale të zhvillimit në FSK, objektivat si dhe për procesin e Rishikimit të Sektorit Strategjik të Sigurisë në Kosovë (RSSSK).

Atasheu nga Shqipëria  kolonel Fiqri Hoxha shprehu kënaqësinë  për emërimin e tij atashe ushtarak në Kosovë, duke shprehur gatishmërinë për të dhënë kontribut personal në shtimin e bashkëpunimit në mes të dy ministrive, më konkretisht në mes të Ushtrisë së Shqipërisë dhe FSK-së.

Kolonel Fiqri Hoxha është atasheu i parë i Ambasadës së Republikës së Shqipërisë i emëruar në detyrën e atasheut ushtarak në Republikën e Kosovës.