Prishtinë, 4 qershor - Natali Veliaj, njihte mirë gjuhën gjermane. Andaj ky fakt e shtyri kompaninë austriake OeSD që ajo të jetë e besueshme për t’i hyrë një tenderi për furnizim me pasaporta, të shpallur nga Ministria e Punëve të Brendshme e Kosovës.

Këtë e pohoi të martën Reinhart Gausterer, drejtor i përgjithshëm i kompanisë austriake OeSD.
 
Ai u ftua si dëshmitar në gjykimin e Natali Veliajt dhe nëntë personave tjerë të akuzuar për keqpërdorim parash gjatë prodhimit të pasaportave biometrike.

Kompania OeSD, më 17 qershor 2011, nënshkroi me MPB-në tenderin për prodhimin e pasaportave biometrikë të kosovarëve, me vlerë prej 14 milionë e 127 mijë eurosh.

Nga kjo shumë pretendohet se 1 milion e 400 mijë euro nuk shkuan asnjëherë në llogarinë bankare të OeSD-së, pasi dyshohet se u keqpërdorën nga Natali Veliaj dhe grupi i saj, të akuzuar mes tjerash për krim të organizuar, shpëlarje parash dhe shmangie nga tatimi.

Gausterer shpjegoi njohjen e tij me Natali Veliajn që tha të ketë ndodhur në hollin e një hoteli, në majin e vitit 2011, kur Gausterer kishte ardhur të interesohej për tenderin e pasaportave.

Ndërmjetës i takimit Gausterer-Veliaj ishte një austriak tjetër - Andreas Fritz nga Oda Tregtare e Austrisë.

/Tribuna/