Prishtinë, 21 korrik - Në vazhdën e hetimeve, lidhur me operacionin e ndërmarrë ditë më parë e që kishte të bënte me një rrjet të krimit të organizuar më konkretisht kontrabandim me migrantë dhe falsifikim të dokumenteve policia kufitare ka bërë arrestimin e personit të dyshuar të dhjetë I. R lindur më 1970, lidhur me këtë rast.  

NJHDPK (njësia e hetimeve të departamentit të policisë kufitare) më urdhër të Gjyqtares së procedurës paraprake në Gjykatën e Qarkut në Prishtinë, ka bërë bastisjen e dy lokaleve në dy lokacione të ndryshme në qytetin e Prishtinës.

Lokalet ku i dyshuari kishte ushtruar veprimtarinë e tij kundërligjore funksiononin si shtypshkronja.

Gjatë bastisjes së këtyre lokaleve, janë gjetur dhe konfiskuar si prova materiale: 

Një makinë e prodhimit të ID-ve të ndryshme

Dy shtëpiza kompjuterike

Tre patentë shofer të republikës së Kosovës

Tre patentë shofer të shtetit finlandez

Një letërnjoftim

Banderola të Shqipërisë,

Bileta parkingu të QKUK-së.

Të gjitha  këto gjëra tashmë të konfiskuara dyshohet të jenë të falsifikuara dhe të prodhuara nga i dyshuari I. R.

 Të dyshuarit i është caktuar masa e ndalimit prej 48 orësh për të vazhduar me procedura të mëtutjeshme hetimore.