Prishtinë, 13 mars - Inspektorati Policor i Kosovës, pas një hetimi intensiv për tre muaj ka arrestuar sot në ora 01:00 një zyrtar policor të stacionit Qendra – Drejtoria Rajonale e Prishtinës. 

Operacioni i koduar me emrin “Rekruti” është realizuar në bashkëpunim me Drejtorinë për hetimin e trafikimit me qenie njerëzore të Policisë së Kosovës. 

Arrestimi i zyrtarit policor është bërë me dyshimin se i njëjti ka kryer veprat penale: trafikim me njerëz, keqpërdorimi i pozitës apo autoritetit zyrtar, kanosje, sulm dhe ndërprerje e palejuar e shtatzënësisë.

Gjatë këtij operacioni janë identifikuar dy viktima potenciale të trafikimit dhe është kryer një kontroll në njërin prej lokaleve ku dyshohej se mund të ndodhet viktima e rastit.

Gjatë realizimit të kontrollit në një lokal në Prishtinë është identifikuar një viktimë potenciale e trafikimit dhe e njëjta është shoqëruar në zyrat e Inspektoratit Policor të Kosovës për intervistim.

Po ashtu në po të njëjtën ditë është identifikuar edhe viktima e dytë e këtij rasti, e cila po ashtu në të njëjtën datë është intervistuar në cilësinë e viktimës.

Të gjitha veprimet lidhur me këtë rast janë kryer nën autorizimin e Prokurorit përkatës dhe ndaj të dyshuarit është lëshuar aktvendimi për masën e ndalimit 48 orë për të vazhduar me procedurat tjera.