Prishtinë, 21 djetor - Inspektorati Policor i Kosovës në bashkëpunim me Drejtorinë Rajonale të Policisë së Prishtinës dhe në konsultim me Prokurorin Komunale të Prishtinës, përkatësisht prokurorin kujdestarë, ka arrestuar zyrtarin policor i cili shërben në Stacionin Policor të Lipjanit, por aktualisht i angazhuar në Task Forcën e Trafikut të Qytetit në Prishtinë.

Zyrtari policor eshte arrestuar nen dyshimin për veprën penale “marrja e ryshfetit” dhe “Shpërdorim i detyrës zyrtare ose autorizimit”, për shkak se me datën 20.12.2011, rreth orës 18:00, ka marr nga një qytetar të holla në vlerë prej 20 euro, ndërsa është arrestuar në ora 20:00 nga Inspektorati Policor i Kosovës në bashkëpunim me Drejtorinë Rajonale të Policisë së Prishtinës.

Zyrtari Policor derisa ishte duke rregulluar komunikacionin në rrugën “Deshmoret e Kombit” në Prishtinë, saktësisht në udhëkryqin përball PTK-së, e ka ndalur qytetarin në fjalë, i cili ishte duke drejtuar veturën e tij.

Zyrtari Policor i ka konfiskuar dokumentet e automjetit qytetarit, me ç’rast nuk i ka shqiptuar tiketë për kundërvajtje, por nga qytetari ka kërkuar që t’i jap të holla në vlerë prej 20 euro, si kundërvlere për mos shqiptim të tiketës.