Arrestohet Dardan Molliqaj
Dardan Molliqaj është kërkuar nga Policia e Kosovës, për “prishje të rendit dhe qetësisë publike, si dhe dëmtimin e veturave zyrtare”.
Molliqaj është larguar nga jeta publike që nga protesta në Prishtinë në të cilën ai u pa duke e nxjerrë nga vetura zyrtare këshilltarin e ministrit Memli Krasniqi, Shasivar Haxhiajn, ndërsa të mërkurën u rikthye duke iu drejtua masës në protestën e organizuar nga opozita.
Vetëvendosje në reagimin e tyre ka teksuar se gjatë këtyre muajve, argumentet e faktuara dhe rezistenca e Opozitës së Bashkuar kanë mobilizuar masat në Kosovë në protesta gjithëpopullore.
Protesta madhështore e 17 shkurtit sipas VV ia ka bërë të qartë Isa Mustafës dhe Hashim Thaçit se ditët e këtij regjimi antipopullor janë të numëruara.
Prandaj sipas VV në panik e sipër ata po përdorin të gjithë aparatin e dhunës si mjeti i fundit për të mbajtur në këmbë regjimin e tyre te delegjitimuar.
"Nuk ka dhunë që mund ta ndalë frontin e gjerë shoqëror të rezistencës që është ngritur kundër këtij regjimi. Lëvizja Vetëndosje! kërkon lirimin e menjëhershëm të Dardan Molliqajt dhe të të gjithë aktivistëve të tjerë që po mbahen të burgosur për shkak se kanë qenë në ballë të këtij fronti."
"Deri në lirimin e të gjithë aktivistëve dhe deri në ditën e largimit të këtij regjimi shtypës policor, në Kosovë nuk mund të ketë drejtësi dhe qetësi", thekson VV.
