Prishtinë, 3 qershor - Dje rreth orës 22:00 Policia e Kosovës konkretisht drejtoria për hetimin e trafikimit me narkotik ka realizuar një operacion policor të koduar me emrin “ERA” ne rajonin e Podujevës, me ç’ rast  ka  arrestuar tre persona me dyshimin e bazuar se të njëjtit  kane kryer veprën penale “Trafikim me substanca narkotike”.

Personat e arrestuar janë: F. R i lindur me 1978 mashkull/shqiptar /kosovar, D. Zh i lindur me 1965 mashkull/shqiptar /kosovar, A. F i lindur me 1972 mashkull/shqiptar/kosovar.

Gjatë këtij operacioni policore  janë kryer bastisje ne tri lokacione  shtëpi të  personave të dyshuar me ç’ rast janë konfiskuar  109 kilogram substancë narkotike qe dyshohet të jetë e llojit Marihuanë.

Po ashtu ne cilësi të provave materiale tek të dyshuarit janë gjetur dhe konfiskuar dy armë,  një e llojit shkorpion  me karikator me 25 fishek të kalibrit  7.65 dhe një pistolete Cervena zastava   me karikator me 14 fishek  të kalibrit 9 milimetra.

Gjithashtu në ketë operacion policor janë konfiskuar edhe katër vetura, tri  vetura udhëtarësh dhe një kombi bus që ishte përgatitur për transportimin e substancës narkotike dhe para bankënota në shumën 4150 euro në cilësi të provave materiale si dëshmi për kryerjen e veprës penale.

Sipas hetimeve preliminare dyshohet se kjo sasi e substancës narkotike ka qene e destinuar për tregun e jashtëm dhe vlera e saj llogaritet të jete mbi  76000 euro.

I tërë operacioni policore është kryer në konsultim më prokurorin përkatës dhe  me autorizimin e tij të  dyshuarve u është caktuar masa e ndalimit policor për 48 orë.

Luten qytetaret qe nëse kane informacione të kësaj natyre të informojnë Policinë e Kosovës  në numrin e telefonit pa pagesë:  0800-11111. Informacioni juaj do të trajtohet me profesionalizëm dhe konfidencialitet nga Policia e Kosovës