Suharekë, 1 korrik - Në Suharekë  janë arrestuar tre persona pasi kanë kanosur me armë zjarri dy burra të tjerë. Rasti ka ndodhur mbrëmë rreth orës 21:20.

\"Janë arrestuar tre të dyshuar meshkuj shqiptar pasi që të njëjtit edhe me një të dyshuar tjetër, dyshohet për shkak të një mosmarrëveshje të mëhershme, kanë kanosur me armë zjarri në një kafeteri dy viktimat meshkuj shqiptar\", thuhet në raportin e policisë.

Njësitet policore gjatë kontrollit te të dyshuarit kanë gjetur dhe konfiskuar dy pistoleta të tipit TT, ndërsa pas bastisjes në shtëpitë e të dyshuarve kanë gjetur dhe konfiskuar edhe një pushkë gjuetie (me leje) 37-patrona të pushkës së gjuetisë, 16-patrona të zbrazët, dhe 22-fishek cal-7.62 mm.

Me vendim të prokurorit, të dyshuarit pas intervistimit janë dërguar në mbajtje, kurse rasti është duke u hetuar.