Prizren, 8 korrik - Policia në Prizren njofton se janë arrestuar grabitësit e mitur që kishin plaçkitur ditë më parë një qytetar holandez.

\"Me datën 3 korrik, rreth orës 02:40 të natës, në rrugën Reshat Karjagdiu  ka ndodhur një grabitje e kryer nga një grup prej katër të dyshuarve të mitur\", thuhet në raportin e policisë.

Sipas denoncuesit të rastit, një qytetar holandez, të dyshuarit e kishin rrahur për çka edhe ka pranuar trajtim mjekësor. Më pas ia kishin grabitur një telefon celular Sony Xperia XZ dhe kishin ikur në drejtim të panjohur.

Policia njofton se pas një pune operative hetimore dhe në bazë të informacioneve të mbledhura nga terreni është arritur të identifikohen të dyshuarit. 

\"Dy prej tyre tanimë ndodhën nën masën e arrestit ndërsa edhe dy të tjerë pritet që shpejt të arrestohen\", raporton policia.