Prishtinë, 1 prill - Njësitet policore të rajonit të Prishtinës në kuadër të intensifikimit të masave për garantimin e rendit dhe sigurisë publike si dhe goditjes së individëve dhe grupeve kriminale, kanë organizuar punën e tyre me fokus të veçantë zbardhjen e veprave kriminale, identifikim dhe arrestimin e të dyshuarve të implikuar në ngjarjet kriminale.

Operacioni i fundit është realizuar dje nga njësitet policore të Drenasit, me ç’ rast  janë arrestuar dy persona të dyshuar, për të cilët dyshohet me bazë të jenë të përfshirë në një rast të grabitjes, që ka ndodhur 30.03.2016 rreth orës 20:30, në fshatin Gllobar të komunës së Drenasit.

Rasti ka ndodhur, në një dyqan ku persona të dyshuar pasi kanë shtënë në ajër me armë zjarri, kanë arritur që nën kërcënimin e armës, të grabisin para të gatshme nga punëtorët e dyqanit.
  
Menjëherë pas raportimit të rastit, njësitet policore kanë ndërmarrë një  varg veprimesh hetimore dhe operative të cilat kanë  rezultuar me identifikimin dhe arrestimin e dy personave të dyshuar:


Z. E,  mashkull, 25 vjeç, shtetas i Republikës së Kosovës dhe
B.M, mashkull, 23 vjeç, shtetas i Republikës së Kosovës.


Personave të arrestuar pasi që u është  shqiptuar  masa e ndalimit prej 48 orësh, me rekomandimin e Prokurorit të shtetit,  janë dërguar në qendrën e mbajtjes. Vlen të përmendet se i dyshuari Z. E, dyshohet të jetë  i përfshirë edhe ne një rast tjetër të grabitjes të ndodhur në tetor të vitit 2015, po në të njëjtin dyqan.