Prishtinë, 13 korrik - Departamenti Special Antikorrupsion në udhëheqje nga prokurori i Prokurorisë Speciale të Republikës se Kosovës pas një hetimi me dyshimin e bazuar për ‘Pastrim parash’, dje ka realizuar operacionin policor të koduar “Pastrimi” me ç’ rast ka arrestuar katër persona me dyshimin e bazuar se kanë kryer veprën penale ‘Pastrim parash’.

Operacioni policor është realizuar në Rajonin e Pejës, konkretisht në komunën e Klinës. Hetimet lidhur me këtë rast ndërlidhen me arrestimet e realizuara në vitet 2009 dhe  2011 nga ky Departament .

Personat e arrestuar në operacionin e tanishëm janë: I. G. viti i lindjes 1975 mashkull, K.  G.  viti i lindjes 1964 mashkull, Z .  P. viti i lindjes 1935  mashkull,  K . A. viti i lindjes 1985 mashkull, të gjithë nga rajoni i Pejës.

Ky hetim është vazhdimësi e rasteve që tashmë gjenden një në Gjykatën e Qarkut në Prishtinë dhe një në Gjykatën e Qarkut në Pejë.

Rasti i koduar Koalicioni i cili është në procedurë gjyqësore në Gjykatën e Qarkut në Prishtinë, dyshohet se në mënyrë të kundërligjshme janë përfituar gjithsej 1,257,928.14€.

Rasti Koalicioni Plus i cili është në procedurë hetimore në Prokurorinë Speciale të Republikës së Kosovës dhe procedurë gjyqësore në Gjykatën e Qarkut në Pejë, dyshohet se po ashtu në mënyrë të kundërligjshme janë përfituar gjithsej 1,225,927.93€.

Të arrestuarit  me autorizim të prokurorit përkatës janë dërguar ne Qendrën e mbajtjes.  Lënda do të procedohet në Prokurori dhe në Gjykatën kompetente për procedim të mëtejmë.