Prishtinë, 11 nëntor - Policia e Kosovës ka bërë të ditru se bazuar në informacione dhe hetime paraprake nga Drejtoria për hetimin e trafikimit me qenie njerëzore (DHTQNJ) dje rreth orës 17:00, në rajonin e Prishtinës, konkretisht në Fushë Kosovë ka realizuar një operacion policor që ka rezultuar me arrestimin e katër personave të dyshuar dhe identifikimin e një viktime të trafikimit me qenie njerëzore.

Katër (4) personat e dyshuar janë vënë nën pranga me dyshimin e bazuar se të njëjtit kanë kryer veprën penale “trafikim me njerëz” dhe “shërbime seksuale të viktimës së trafikimit”.

Sipas informacioneve të mbledhura pas një pune operative hetimore në teren hetuesit policor kanë arritur të lokalizojnë vendqëndrimin e viktimës-shtetase e Shqipërisë, e cila ishte mbajtur nën kontroll të plotë nga personi i dyshuar, po ashtu shtetas i Shqipërisë.

I dyshuari tashmë i arrestuar me qëllim përfitimi personal e ka detyruar viktimën të kryente  shërbime seksuale me persona të ndryshëm me pagesë, kurse tre (3) të dyshuarit tjerë janë arrestuar për veprën penale “shërbime seksuale të viktimës së trafikimit”.

Personat e dyshuar tashmë të arrestuar janë: L. S. 1977 shtetas i Republikës së Shqipërisë; D. M. 1981 shtetas i Republikës së Kosovës; H. D. 1987 shtetas i Republikës së Kosovës dhe S. R.    1983  shtetas i Republikës së Kosovës.

Lidhur me këtë rast është njoftuar mbrojtësi i viktimave dhe në prezencë të tij është intervistuar viktima, e cila më pastaj është dërguar në shtëpinë e sigurt dhe është duke u trajtuar sipas procedurave standarde për ndihmë dhe mbrojtje të viktimave të trafikimit.

Të dyshuarve me urdhër të prokurorit kompetent iu është caktuar masa e ndalimit  prej 48 orësh për të vazhduar me procedura të mëtutjeshme.