Las Vegas, 31 korrik - Këngëtarja me origjinë shqiptare, Rita Ora, është duke punuar me shumë efikasitet për të rritur imazhin e saj në të gjithë botën.

Pasi përfundoi së fundmi në kopertinën e “Complex Magazine” dhe “ASOS”, 21-vjeçarja debutoi në Las Vegas, si e ftuar nderi në një prej kazinove më të njohura të “qytetit të mëkateve” dhe në klubin e natës “Lavo”.

E veshur me një fustan të bardhë dhe një xhaketë motoristësh, edhe një herë më shumë Rita tregoi se përse format e saj janë aq të lakmuara, ndërsa u shpreh entuziaste për mbërritjen e saj në SHBA, duke ndarë kënaqësinë e saj me një status në “Twitter”, për 883 mijë ndjekësit që ka.

Ndërkohë, stili i këndimit të Ritës, mbiemri i vërtetë i së cilës është Sahatçiu, duket si një kthim i ëmbël në kohë në hip-hopin e viteve 1990, çka e ka bërë më të lehtë tërheqjen e shumë fansave.

Këngëtarja, e lindur në Prishtinë në vitin 1990, u transferua në Britaninë e Madhe në moshë të vogël. Kënga e saj më e famshme, “Hot Right Now”, mbajti për disa javë vendin e parë në klasifikimin e muzikës britanike.