Los Angelos, 25 dhjetor - Rihanna i dhuroi 1,75 milionë dollarë një spitali në Barbados, vendlindjen e saj, për të nderuar kujtimin e gjyshes që ndërroi jetë gjatë 2012-s.

Këngëtarja 24-vjeçare theksoi se është e nderuar që të kontribuojë për vendin e saj në këtë mënyrë.

Shuma e dhuruar spitalit do të shpenzohet për blerjen e pajisjeve mjekësore.

”Mendoj se ky kontribut do të ndikojë shumë për të përmirësuar jetën e njerëzve të Barbadosit, të cilëve u detyrohem të gjithë atë që kam arritur”, deklaroi Rihanna.

24-vjeçarja ishte këngëtarja e tretë më e paguar e 2012-s, me fitime totale prej 53 milionë dollarësh.

Shuma e dhuruar prej saj, ndonëse tepër bujare, mbetet dukshëm larg rekordit të vendosur më parë gjatë dhjetorit nga themeluesi i “Facebook”, Mark Zuckerberg, i cili vendosi të dhuronte 500 milionë dollarë tek një shoqatë bamirësie për të mbështetur projekte në arsim dhe shëndetësi.