Hapet ekspozita "Përceptimet"

Prishtinë, 25 janar - Galeria Kombëtare e Kosovës dhe British Council do të prezantojnë projektin më të ri, që vjen si rezultat i një bashkëpunimi dyvjeçar midis pesë kuratorëve dhe institucioneve nga pesë vende të Ballkanit Perëndimor.
Ekspozita e quajtur "Përceptimet", në Kosovë vjen sot e kuruar nga Arta Agani.
Me një qasje unike dhe të jashtëzakonshme, ekspozita është inicuar nga British Council dhe politika e saj inovative në botën e artit.
British Council dhe Galeria Kombëtare e Kosovës kanë bashkëpunuar në organizimin e ekspozitave të artistëve të mëdhenj britanikë në Prishtinë si Henry Moore dhe Grayson Perry e kësaj radhe do të sjellin në audiencë 14 artiste nga Mbretëria e Bashkuar: Madame Yevonde, Clare Strand, Abigail Lane, Rachel Whiteread, Camilla Løw, Anthea Hamilton, Laura Aldridge, Helen Çadwick, Tracey Emin, Sarah Lucas, Gillian Wearing, Elisabeth Price, Celia Hempton dhe Lubaina Himid; në një "bashkëbisedim" me shtatë artiste kosovare: Alija Vokshi, Alketa Xhafa Mripa, Arbana Hajredinaj, HAVEIT, Rudina Xhaferi, Flaka Haliti dhe Zake Prelvukaj.
Ndonëse veprat e tyre herë pas here paraqiten fizikisht të ndryshme, gjatë këtij diskutimi ato flasin me të njëjtën gjuhë dhe e kuptojnë përsosmërisht njëri-tjetrin.
Gjuha vizuele flet për ndryshime nga një formë në një tjetër të grave në shoqëri, me një histori të guximshme.