Gjakovë, 12 nëntor - Në Komunën e Gjakovës është nënshkruar marrëveshja në mes të Kryetares së Komunës së Gjakovës, znj. Mimoza Kusari Lila dhe Kryeshefit Ekzekutiv të KOSTT (Operator i Sistemit të Transmisionit dhe Tregut të Energjisë Elektrike), Naim Bejtullahu, për mbështetjen e Komunës së Gjakovës për implementimin e një projekti në vlerë prej 5000.00 euro.

Kjo mbështetje vjen si pjesë e përkushtimit të KOSTT për të ndikuar në mirëqenien e komunitetit si një nga parimet e përgjegjësisë shoqërore të korporatave.

Komuna e Gjakovës, nga lista e fshatrave nëpër të cilat ka kaluar linja e transmisionit, këtë përkrahje ka vendosur të ia dedikoj rregullimit të nyjeve sanitare në shkollën fillore “Shtjefën Kurti” në fshatin Novosellë e Epërme.

Komuna e Gjakovës shprehet falënderuese për vullnetin e mirë të korporatave dhe bizneseve të cilat kontribuojnë në të mirë të qytetarëve dhe të komunitetit për një mirëqenie dhe zhvillim të gjithmbarshëm, përderisa mbetet e përkushtuar të ngris standardin dhe kualitetin e jetës në gjithë territorin e komunës së Gjakovës.