Prishtinë, 16 shtator - Ministrja e Tregtisë dhe Industrisë, znj. Hykmete Bajrami, priti në takim ambasadorin e Republikës Kroate, Zoran Vodopija së bashku Kryetarin e Odës Ekonomike në Kroaci, z. Luka Burilovic.

Në takim ishte i pranishëm edhe kryetari i Odës Ekonomike në Kosovë z. Safet Gërxhaliu.

Ky takim bëhet në vazhdën e Forumit Ekonomik Kosovë-Kroaci, në të cilin po marrin pjesë disa biznese kroate dhe kosovare me qëllim të intensifikimit të bashkëpunimit ekonomik dhe tregtar.

Ministrja Bajrami i informoi mysafirët se agjenda e Qeverisë së Republikës së Kosovës është kryesisht agjendë ekonomike.

\"Megjithëse kemi shumë sfida para vetes si shtet i ri, ne jemi të sigurtë se me ndihmën e miqve tanë, në mesin e tyre edhe Kroacia, do t’i tejkalojmë ato dhe do avancojmë agjendën tonë evropiane.\"

Ajo më tej theksoi se Qeveria e Republikës së Kosovës ka ndërmarrë reformat e nevojshme në dobi të bizneseve.

Me pakon e re fiskale sipas saj lehtësohet puna e bizneseve që merren me prodhim dhe po ashtu janë thjeshtëzuar sistemi dhe procedurat tatimore.

Ministrja Bajrami dhe ambasadori Vodopija vlerësuan se shkëmbimet tregtare ndërmjet dy vendeve kanë shënuar rritje të konsiderueshme, por ato mund të  intensifikohen edhe më tej.