Davos, 26 janar - Kancelaria gjermane, Angela Merkel, në kuadrin e punimeve të Forumit Ekonomik Botëror të Davosit ka takuar kryeministrin britanik, David Cameron.

Në bisedën mes shefave të dy vendeve, ndër më të fuqishmet në BE, është bërë fjalë për përgatitjet e samitit të BE-së për miratimin e buxhetit.

Kancelaria gjermane gjatë pjesëmarrjes së saj në forum ka kërkuar reforma të reja ekonomike në Evropë.

“Aftësia konkurruese është tema qendrore për të ardhmen”, ka thënë ajo duke iu drejtuar forumit.

Ajo po ashtu me këtë rast ka kërkuar nga sipërmarrësit, që të investojnë në vendet e Evropës Lindore dhe të Mesme.

Sipas Merkel, shtetet e zonave në fjalë kanë zbatuar me sukses “pa zhurmë dhe pa u vënë re” reforma të shumta. Si rezultat, klima për investime në vendet e përmendura është përmirësuar shumë.