Berlin, 8 mars - Me qëllim të bashkëpunimit ekonomik ndërmjet Kosovës dhe Gjermanisë, në Berlin, u mbajt konferenca “Investoni në Kosovë”, ku Ministrja e Tregtisë dhe Industrisë Mimoza Kusari – Lila prezantoi potencialet që ofron Kosova për të bërë biznes.

Në vendin me ekonominë më të madhe në Evropë, ministrja Kusari – Lila tha se Kosova ofron mundësi të shumta investimesh, ka pozitë të mirë strategjike dhe ka fuqinë punëtore më të lirë në Eurozonë.

"Përkundër propagandës për jo stabilitet politik, Kosova është një vend normal, i qetë, stabil dhe i fokusuar drejt zhvillimit ekonomik. Reformat e ndërmarra nga Qeveria e Republikës së Kosovës kanë treguar rezultate pozitive. Ne kemi një nga sistemet më të mira të TVSH-së në Evropë dhe se jemi duke punuar me përkushtim të plotë për hapjen e tregjeve me vendet e rajonit”, theksoi ajo.
Më tutje, ministrja Kusari – Lila tha se Kosova sot është vend shumë më i mirë për investime se sa që ishte më parë.

“Bizneset tani kanë mundësi të regjistrohen në një vend për një ditë, është eliminuar leja e punës, është reduktuar numri i dokumenteve për import dhe eksport, regjistrimi i biznesit bëhet pa pagesë, si dhe mbrojtja e investitorëve është përmirësuar dukshëm."

"Hapja e 28 qendrave të regjistrimit në të gjitha komunat e Kosovës, do t’iu mundësojë investitorëve qasje më të lehtë të regjistrimit të biznesit. Këto dhe reforma të tjera që jemi duke punuar kanë një qëllim: që Kosova të jetë vendi më i mirë në rajon për të bërë biznes. Ne besojmë që mund të ofrojmë aq sa po kërkojmë”, potencoi Kusari - Lila.

Nën organizimin e Iniciativës Ekonomike për Kosovë dhe Agjencisë për Promovim të Investimeve, ministrja Kusari – Lila vazhdoi fjalimin e saj duke i informuar të pranishmit për raportet tregtare të Kosovës me vende tjera.

Zgjatja e masave preferenciale me Bashkimin Evropian ka rëndësi të madhe për një investitor të huaj pasi që mundëson se me një fuqi të lirë punëtore të eksportohet në tregun me 500 milionë konsumatorë, BE, pa taksë doganore.

"Synimi jonë i ardhshëm është fillimi i negociatave për Marrëveshjen e Tregtisë së Lirë me Bashkimin Evropian.- theksoi ajo.

Në konferencë mori pjesë edhe ministri i Zhvillimit Ekonomik, Besim Beqaj, i cili prezantoi zhvillimin e politikave, biznesit dhe ambienti i investimeve në Kosovë, ndërsa në pjesën e dytë të kësaj konference njohës të ekonomisë kosovare prezantuan dhe diskutuan për storjet e suksesit të Kosovës, me fokus të veçantë bashkëpunimi i kompanive kosovare me ato të jashtme.