Panama City, 27 mars - Kosova është prezantuar për herë të parë në Panairin Ndërkombetar ExpoComer 2014 në Panama.

Ministri i Tregtisë dhe Industrisë, Bernard Nikaj së bashku me kryeshefin e Agjencisë për Investime dhe Përkrahjen e Ndërmarrjeve në Kosovë, Valdrin Lluka, kanë shoqëruar komunitetin e biznesit në Kosovë të përfaqësuar edhe nga Oda Ekonomike e Kosovës, që po marrin pjesë në Panairin Ndërkombetar ExpoComer 2014.

ExpoComer 2014 është panairi me i madh i përgjithshëm në rajonin e Amerikës Qëndrore ku marrin pjesë shumë shtete nga e mbarë bota.
 
Kosova është prezente për herë të parë në këtë shtet, gjë që është vlerësuar lartë edhe nga zyra e Presidencës së Panamasë dhe organizatorët e panairit gjatë ceremonisë së hapjes së panairit në fjalë.

Agjencia për Investime dhe Përkrahjen e Ndërmarrjeve në Kosovë ka financuar pjesërisht pjesëmarrjen në ExpoComer 2014 duke ju mundësuar bizneseve nga Kosova të jenë prezent me qëllim të ndërlidhjeve të partneriteteve biznesore.
 
Gjatë ceremonisë së hapjes së panairit ExpoComer 2014, Ministri i Tregtisë dhe Industrisë, z. Bernard Nikaj u takua me Ministrin për Ekonomi dhe Financa të Panamasë, Frank de Lima i cili e falenderoj Nikaj për prezencën në Panama. Gjate këtij takimi, ata biseduan për intensifikimin e bashkëpunimit ekonomik në mes të dy vendeve.
 
Për më tepër, ministri Nikaj u takua gjithashtu me Ministrin e Punëve të Jashtme të Panamasë, z. Francisco Alvarez De Soto, i cili e uroj Nikaj për hapjen e Ambasadës së parë Kosovare në Amerikën Qëndrore dhe Jugore.
 
Vizita do të vazhdojë edhe dy ditë ku do të ketë takime me ministrin e Tregtisë dhe Industrisë të Panamsë, ku edhe do të nënshkruhet një marrevëshje në mes të  Agjencisë për Investime dhe Përkrahje të Ndërmarrjeve në Kosovë dhe Agjencisë për Promovim të Investimeve në Panama, ProInvex.

Gjithashtu, gjatë kësaj vizite do të nënshkruhet një marrëveshje bashkëpunimi në mes të Odës Ekonomike të Kosovës dhe asaj të Panamasë.

Panama është vendi ku Kosova për herë të parë ka hapur ambasadën në Amerikën Qëndrore.