Prishtinë, 7 qershor - Gjatë ditës së dytë të vizitës zyrtare në Japoni, Kryeministri i Republikës së Kosovës, Hashim Thaçi i shoqëruar nga Ministri i Punëve të Jashtme, Enver Hoxhaj takoi Ministrin e Ekonomisë, Tregtisë dhe Industrisë, Yukio Edano.
 
Kryeministri Thaçi e njoftoi Ministri Edano për zhvillimet në Kosovë, për qëndrueshmërinë në sektorin bankar dhe në atë fiskal, si dhe për mundësitë e shumta që ofron Kosova në fushën e ekonomisë.

Kryeministri theksoi se tani është momenti i duhur për avancimin e raporteve tona ndërshtetërore, duke e përqendruar bashkëpunimin në aspektin ekonomik dhe atë tregtar.

Gjatë takimit, Kryeministri Hashim Thaçi kërkoi mbështetje nga Ministri Edano për organizimin e një forumi për investime në Japoni, apo për dërgimin e një misioni faktmbledhës për të hulumtuar mundësitë e shumta që ofron Kosova.

Ministri i Ekonomisë, Tregtisë dhe Industrisë, Yukio Edano, pasi i ka dëshiruar mirëseardhje kryeministrit të Republikës së Kosovës, ka falënderuar Qeverinë dhe popullin e Kosovës për ndihmën e ofruar në ditët e vështira pas goditjes  nga tërmeti dhe cunami në Japoni.

”Ne ju jemi mirënjohës. Unë personalisht i njoh angazhimet e qeverisë suaj dhe shprehjes së solidaritetit të popullit tuaj me popullin tonë në ditët e tragjedisë, duke ndezur qirinj, si dhe koncertin e Filharmonisë së Kosovës në shenjë respekti për viktimat” tha Ministri Edano.

“Ne jemi të gatshëm të vazhdojmë t’i ndihmojmë Kosovës në zhvillimin e saj ekonomik, duke promovuar Kosovën në kompanitë tona, si dhe vazhdimin e ndihmës për Kosovën nëpërmjet JICA-s, si dhe në mbështetjen e  Qeverisë sonë nëpërmjet JETRO-s në organizimin e forumit ekonomik apo të çfarëdo nevoje, kërkese që shtron Kosova.

Kryeministri Thaçi dhe Ministri Edano u pajtuan që bashkëpunimi të thellohet dhe të kalohet në takimin e grupeve ndërqeveritare për të hartuar strategji bashkëpunimi.

Po sot, Kryeministri i Republikës së Kosovës, Hashim Thaçi ka takuar Kryetarin e Komisionit për Evropë në Federatën e Japoneze të Biznesit (KEIDAREN), Shinichi Yokoyama.

Kryeministri Thaçi e falënderoi Yokoyuama për pritjen e ngrohtë dhe mundësinë për t’u takuar për të diskutuar rreth mundësisë së bashkëpunimit në sektorin e ekonomisë në mes të dy vendeve tona.

Gjatë takimit, Kryeministri e njoftoi z.Yokoyama për gjendjen e ekonomisë kosovare, për zhvillimin dhe për potencialin e madh që e ka Kosova në shumë sektorë, si në energji, miniera, bujqësi, turizëm, me klimën e mirë të investimeve.

Po ashtu, Kryeministri nëpërmjet Yokoyama ju bëri ftesë të gjitha kompanive japoneze të vijnë në Kosovë të hulumtojnë tregun dhe mundësitë e mëdha që ka Kosova në shumë fusha, si dhe ftoi Federatën e biznesit japonez që të vizitojnë Kosovën.

Kryetari i Komisionit për Evropë në Federatën e Japoneze të Biznesit (KEIDAREN), Shinichi Yokoyama e falënderoi Kryeministrin Thaçi për ftesën, si dhe premtoi që do t’i informojë kompanitë japoneze për mundësitë që ofron Kosova në shumë fusha me interes.