Athinë, 9 mars - Ministri i Jashtëm grek Dimitris Avramopulos ka njoftuar për hapjen në vend të përfaqësisë tregtare të Republikës së Kosovës, pavarësia e së cilës nuk është njohur nga pala greke.

Ministri theksoi se ky vendim nuk do të ndikojë në qëndrimin e Greqisë ndaj çështjes së statusit të Kosovës, por bëri të qartë njëkohësisht se ekonomia është mjeti kryesor për mbarëvajtjen e proceseve politike.

“Synimi strategjik i Greqisë është që të krijohet një hapësirë e paqes, sigurisë, stabilitetit dhe zhvillimit në rajonin më të gjerë të Evropës Juglindore”, tha ministri i Jashtëm grek.

Avramopoulos po ashtu tha se Greqia mbështetë dialogun Kosovë-Serbi, duke shtuar se sot më shumë se kurrë paqja dhe stabiliteti i duhen Ballkanit Perëndimor.

Ministri Avramopoulos shprehu përkrahjen e Athinës edhe për agjendën evropiane të Kosovës, duke përfshirë  procesin e liberalizimit te vizave dhe marrëveshjen e stabilizim asocimit.

“Greqia është pjesë e qëndrimeve unike të BE-se lidhur me integrimin dhe perspektivën evropiane të Kosovës”, tha ministri Avramopoulos, duke vlerësuar rolin e përgjegjshëm, konstruktiv dhe paqësor të Kosovës në proceset politike rajonale.