Mitrovicë, 7 korrik - Në kuadër të aksionit humanitar “Ndihmo edhe ti” për rindërtimin e shtëpive në veri të Mitrovicës, deri me tani kanë nisur të rindërtohen gjithsej 16 shtëpi. Prej tyre 11 janë në Lagjen e Boshnjakëve, 3 në zonën e “Tre rrokaqiejve” dhe 2 në Kroin e Vitakut.

Për të parë ecurinë e rindërtimit të këtyre shtëpive, këto lagje janë vizituar nga një  komision i përbërë nga zyrtarë komunalë, përfaqësues të partive opozitare në Kuvendin e Komunës dhe përfaqësues të lagjeve të veriut. U vlerësua shumë puna që po bëhet aty prej kompanive të ndryshme që kanë marrë përsipër rindërtimin e një numri të caktuar të shtëpive.  

Nënkryetari i komunës, Riza Haziri, tha se është duke u bërë një punë shumë e mirë prej të gjitha atyre kompanive që kanë filluar të rindërtojnë shtëpitë e djegura dhe të shkatërruara gjatë luftës së fundit. “Jemi shumë të kënaqur dhe i falënderojmë të gjithë ata që janë duke ndihmuar”.

Ai theksoi se premtimet për të ndihmuar rindërtimin në veri më së miri janë duke e realizuar pronarët e kompanive private. “Shumica e atyre që janë deklaruar për rindërtimin  e shtëpive kanë nisur të përgjigjen pozitivisht, për çka tregon edhe vetë puna në terren”.

Nënkryetari Haziri tha se më ngadalë po shkon derdhja e mjeteve të premtuara në kuadër të këtij aksioni. “Deri me tani janë mbledhur më shumë se 300 mijë euro, përderisa premtimet kanë qenë deri në 1.5 milion euro”.

Ai tha se është bërë një listë  e saktë me emrat dhe shumat e premtuara të të gjithë atyre që janë bërë pjesë e aksionit “Ndihmo edhe ti”. “Ne kërkojmë nga ata që kanë premtuar  të ndihmojnë që sa më parë  të përgjigjen pozitivisht në mënyrë që ky aksion të jetë sa më i suksesshëm dhe të krijohen kushte për kthimin e të gjithë të zhvendosurve në shtëpitë e tyre”.

Lista e shtëpive që janë duke u rindërtuar në veri:

1. Shtëpia e Latif Ademi, boshnjak, në Lagjen e Boshnjakëve, donacion i Kompanisë “Dukagjini’, ndërsa punëkryes “Eurondërtimi, me pronarin Fatmir Behrami.
Sipas vlerësimit janë krye rreth 75% të punëve të vrazhda.

2. Shtëpia e Kemail Mehmetit, komuniteti turk, në Lagjen e Boshnjakëve, donacion i Kompanisë “Dukagjini”, punëkryes  “Eurondërtim” me pronarin Fatmir Behrami.
Punët janë në fazën fillestare.

3. Shtëpia e Bekim Hasanit, Lagja e Boshnjakëve, donacion i Kompanisë “Patroni” nga Malisheva me pronarin Habib Morina, punëkryesi vetë kompania. Sipas vlerësimit janë krye rreth 60% të punëve të vrazhda.

4. Shtëpia e Albert Pecit, Lagja e Boshnjakëve, donacion i Kompanisë “Enginering” nga Suhareka me pronarin Rexhep Hajdarin, punëkryes vetë kompania. Sipas vlerësimi janë duke u krye punët përfundimtare.

5. Shtëpia e Rexhep Avdiut në Lagjen e Boshnjakëve, donacion i Kompanisë “Remo Comi” me pronarin Vehbi Miftari, punëkryes vetë kompania. Janë duke u krye punët finale.

6. Shtëpia e Remzi Beqirit në Lagjen e Boshnjakëve, donacion i Kompanisë “Haxha Com” me pronarin Haxhi Zejnullahu, punëkryes vetë kompania. Është afër përfundimit të punimeve.

7. Shtëpia e Afrim Ajet Kelmendit në Lagjen e Boshnjakëve, donacion i Kompanisë “Albi Mall”. Vazhdojnë punimet e  vrazhda.

8. Shtëpia e Hilmi Miftarit në Lagjen e Boshnjakëve, donacion i Kompanisë “Eurondërtim”, punë kryes vetë kompania. Shtëpia është përfundua më tepër se një muaj më parë, ku edhe është vendosur pronari.

9. Shtëpi e Luan Miftarit në Lagjen e Boshnjakëve, donacion i Kompanisë “Haxha Com”, punëkryes vetë kompania. Punët janë në fazën përfundimtare.

10. Shtëpia e Fahredin Ramaxhikut në Lagjen e Boshnjakëve, donacion i Kompanisë, “Zariqi” me pronarin Ahmet Zariqin, punëkryes vetë kompania. Kanë mbetur edhe disa punë brenda shtëpisë.

11. Shtëpia e Fatmir Abrashit në Lagjen e Boshnjakëve, donacion i kompanisë Burimi me pronarin Burim Fazliu, punëkryes vetë kompania. Janë kryer punët e vrazhda dhe janë vendosur dritaret, ndërsa nga data 13 korrik nuk ka punuar fare. Pronari i shtëpisë është shumë i pakënaqur.

12. Shtëpia e Sadete Deliut, në Lagjen “Tre Rrokaqiejt”,donacion i Kompanisë Altrade, punëkryes vetë kompania. Janë duke u kryer punët finale

13. Shtëpia e Islam Sylës, në Lagjen “Tre Rrokaqiejt, donacion i Kompanisë “Linprojekt’ me pronarin Jusuf Haxhimehmeti, punëkryes vetë kompania. Është duke u përgatitur pllaka.

14. Shtëpia e Sadik Dubovcit në Lagjen “Tre Rrokaqiejt”, donacion i Kompanisë “Devolli”,punëkryes Kompania Fitimi me pronarin Fetah Mehmeti. Janë krye punët e vrazhda.

15. Shtëpia e Shukri Pecit në Lagjen “Kroi i Vitakut” donacion i  Loshi Compani, punëkryes vetë kompania. Afër përfundimit.

16. Shtëpia e Basri Osmanit në Lagjen “Kroi i Vitakut” donacion i Kompanisë Devollli, punëkryes Kompania “Fitimi” me pronarin Fetah Mehmeti. Afër përfundimit të punëve të vrazhda.