Shkruar nga Gani Qarri       

Pas shumë pritjesh, shpresash e zhgënjimesh,sipas një lajmi të publikuar në faqen zyrtare të Gjykatës së Hagës, të premten më 9 nëntor u njoftua se pas më shumë se dy vjetësh hetimi dhe një maratone rigjykimi e cila zgjat që nga 21 korriku i vitit 2010,më në fund më 29 nëntor të vitit 2012,vetëm një ditë pas jubileut kombëtar të shpalljes së pavarësisë së Shqipërisë etnike, do të bëhet i ditur vendimi përfundimtar i Gjykatës së Hagës ndaj Ramush Haradinajt.

Është e njohur dhe e ditur për të gjithë, se pas gjykimit të parë i cili zgjati për rresht tri vjet me radhë,me vendimin e marrë nga Paneli Gjykues,ish kryeministri u lirua vetëm më 3 Prill të vitit 2008,pra rreth dy muaj e gjysmë pas shpalljes së Pavarësisë së Kosovës, si i pafajshëm për të gjitha akuzat, duke u lejuar që të kthehej në vendlindje dhe atdheun e tij,për lirinë dhe pavarësinë e të cilit,kontribuoi dhe dha shumë ai dhe familja.

Por lirimi dhe pafajësia e tij e shpallur nga kjo Gjykatë,siç edhe do të dëshmohej më vonë, ishin të përkohshme dhe do të zgjasnin vetëm deri më 21 korrik të vitit 2010,kur Tribunali i Hagës do të \"pendohej\" për vendimin e marrë nga Gjykata e tij e cila pas 17 vitesh krijimi, për herë të parë në historinë e ekzistencës së saj si e tillë,do të merrte një vendim për kthimin në rigjykim të ndonjë të liruari me unanimitet, siç ndodh me rastin e Ramush Haradinajt.

Herën e parë Ramushi u mor papritmas dhe në kohën kur sapo kishte filluar të dëshmonte në vepër,vlerat e tij udhëheqëse dhe frytet e instalimit të shtetit ligjor, me 5 mars të vitit 2005 ,derisa kryente me përkushtimin më të lartë njerëzor funksionin e Kryeministrit të qeverisë së sapoformuar të Kosovës të cilën edhe pse do ta udhëhiqte vetëm për kohë të shkurtër,megjithatë që në 100 ditshin e parë, arriti të bëhej shembull i suksesit dhe qeverisjes së mirë të vendit.

Kjo ishte koha kur edhe pse ish Kryeministri padrejtësisht do të akuzohej nga Gjykata e Hagës për krime lufte pa asnjë hezitim dhe vullnetarisht do të dorëzohej vet atje, pa ndjekje policësh dhe masa tjera ligjore ndaj tij, duke besuar në Gjykimin e drejtë të Gjykatës. Ndaj,edhe përkundër 37 akuzave që padrejtësisht rëndonin mbi te,atëbotë në mungesë të fakteve,ai do të lirohej për t`u kthyer si triumfues i madh i pafajësisë në atdhe.

Megjithatë, përkundër lirimit të tij- shpallur rreth dy vite më parë,pra më 3 prill të vitit 2008 nga Gjykata, në Korrik të vitit 2010,në kohën kur Ramush Haradinaj tani bënte detyrën e kryetarit të AAK-s, apo partisë kryesore opozitare dhe ishte i preokupuar me përgatitjet për zgjedhjet e ardhshme që parashiheshin të mbaheshin në Kosovë, për çudinë e shumë kujt, mu këtë njeri të dëshmuar të sakrificave për komb dhe luftëtarin e pa kompromis për atdhe, do ta thërriste edhe një herë po e njëjta \"shtëpi\" e drejtësisë ,në mënyrë që ai të paraqitej përherë të dytë para Tribunalit të saj, siç thuhej shprehimisht-për rigjykim.

Sipas njoftimeve më të reja i ashtuquajtur rigjykim ndaj Ramush Haradinajt,tani do të zgjasë deri nga fundi i nëntori të vitit 2012, kur  edhe pritet që kjo Gjykatë të marr një vendim i cili nuk mund të jetë tjetër përveçse përsëritje e ish vendimit të parë dhe rishpallje e pafajësisë së tij.

Pra pas gjithë kësaj Odisejade të orkestruar ndaj ish Kryeministrit të Kosovës dhe një periudhe të gjatë gjykimesh e rigjykimesh ndaj tij,vendimi që do të merret nga kjo Gjykatë më 29 nëntor të këtij viti, tanimë vetëm një ditë pas mbajtjes së festimit të 100 vjetorit të Shpalljes së Pavarësisë së Shtetit Shqiptar,(derisa herën e parë do të lirohej rreth dy muaj e gjysmë pas shpalljes së Pavarësisë së Kosovës)duhet të jetë i fundit dhe i pakthyeshëm asnjëherë.

Ky vendim i Gjykatës së Hagës,jo vetëm se ndryshon nga i pari,por edhe pritet me më shumë kureshtje nga publiku ynë kombëtar dhe qarqet ndërkombëtare gjithandej në vend dhe Botë. Ndaj le të jetë i fundit dhe që nuk guxon të përsëritet më në asnjë formë as mënyrë. Për të qenë i tillë,ai duhet të jetë  i drejtë  dhe i paanshëm,  përfundimtar dhe i pranueshëm edhe për Ramush Haradinajn, Kosovën dhe të gjithë Shqiptarët kudo.