Shkruar nga Seremb Gjergji

Gjashtë vjetori i Pavarësisë, po e gjen Kosovën në një situatë dhe në një klimë ku Universiteti i Prishtinës – Rektoratit u kanë dalë manipulimet dhe keqpërdorimet në shesh. Pra me një proces edukimi të keqpërdorur dhe keq-menaxhuar. Tash po kërkohet ndryshimi; dhe ky ndryshim nuk vjen nga jashtë, por nga brenda. Ka ardhë koha që Rektori të jap dorëheqje – madje edhe nëse është vetëm për çështje morale.

Në Protestë takova shumë student dhe studente që vërtetë janë shumë ambicioz, të palodhshëm dhe shumë energjik, e që dëshirojnë ta shohin jo vetëm Universitetin e Prishtinës modern, por edhe vet Shtetin e Kosovës. Qëndrimet e shumicës prej tyre janë të pjekura dhe me vizion të qartë;  janë vërtetë për t’u lakmuar nga të gjithë Ne.

Arsim Bajrami – deputet thotë se problemet dhe dështimet në UP janë probleme sistemore dhe strukturore; pothuajse asnjëherë të trajtuara nga Universiteti i Prishtinës. Protesta aktuale po tregon që është e vërtetë! Z. Bajrami pati dhënë dorëheqje në kohën e tij si Rektor.

Por, këto çështje po trajtohen tash! Nga protestat për arsim dhe shkencë, mund të eskalojnë/rriten në protesta për zhvillim dhe mirëqenie në tërë Kosovën.

Njerëzit vullnet mire në Kuvendin e Kosovës  të mendojnë dhe veprojnë drejtë për fëmijët e tyre, fëmijët tanë dhe të ardhmen e këtij vendi.

Njëherësh, në protestë pashë zyrtarë të Vetëvendosjes, të cilët me çantat e mbushura me gjësend të forta, shtynin studentët në konflikt me Policinë e Kosovës. Po them Policinë e Kosovës, sepse ata janë familjarët tanë; të Kosovës, që po mbrojnë rendin dhe ligjin. Pjesëmarrja e politikës ka bërë që edhe studentët të hezitojnë dhe mos dalin përkrahë kolegëve të tyre.

Beje thirrje të gjitha partive politike që të mos involvohen/përfshihen në PROTESTA. Partitë dhe grupet politike i kanë mijëra rrugë të tjera që mund t’i adresojnë këto probleme – të ngritura nga studentët, si: Kuvend, Institucione, Gjykata, Institucione Ndërkombëtare, etj. Problemet e Universitetit të Prishtinës mendoj se duhet të zgjidhen nga rezultatet, faktorët dhe politikat e vet universitetit, përfshirë edhe studentët dhe vullnetin e tyre.

Si pjesëmarrës i protestës se 1 tetorit 1997; ishin studentët e po këtij UNIVERZITETI  që i treguan botës se Ne jemi kundër padrejtësive, shkeljeve, dhunës, vrasjeve dhe terrorit; edhe sot janë studentët e po të njëjtit universitet. Me 1968 demonstrata ndër të tjera ka bërë thirrje për universitet; me 1981 dhe 1989 dhe viteve që rrodhën pas, nga i njëjti universitet dolën studentët për të protestuar për drejtësi. Mos harroni?!

Presidentja, që përmes Kushtetutës përfaqëson popullin e Kosovës, duhet të dal dhe të thotë – STOP. Të hapë rrugë për një zgjidhje që shkon në interes të studentëve, universitetit, veçmas shtetit.

Kurse, Akademia e Shkencave të Kosovës duhet ta ketë një qëndrim – se edhe ata, apo shumica kanë dalë nga ky universitet. Veçmas, duhet të deklarohen së paku për parimet morale të kësaj gjendje, që fillon në Rektorat e përfundon në Akademinë e Shkencave.

Institucionet e Kosovës duhet të dinë se kjo protestë mund të jetë vetëm hapi i parë i pakënaqësive që të rinj e Kosovës e shohin në ardhmërinë e tyre. Vendi ynë ka më shumë nevojë për Perspektivë dhe Mundësi dhe shumë më pak për protesta.