Shkruar nga Avni Klinaku

Për një dekadë të tërë Albin Kurti e përdori dhe e keqpërdori elementin kombëtar të shqiptarëve për qëllimet e veta karrieriste. Tani ky elementi kombëtar në LVV “po i pështillet nëpër këmbë”.

Me veprimet e fundit, me “kthesat e tij të forta politike” ai ka vendosur që ta flakë jashtë partisë së tij këtë element! Strukturën tjetër e ka të gatshme! Albin Kurti, - ky Zhosef Fushe i ditëve tona.

Që nga krijimi i Lëvizjes Vetëvendosje, Albin Kurti është dredhur e përdredhur nga njëri skaj politik në skajin tjetër.

Pa dyshim që ju kujtohet kur Kurti dhe partia e tij, KFOR-in, UNMIK-un e më vonë edhe EULEX-in i quante kolonialistë; domosdo ju kujtohen gomari me kravatë dhe “çurani” si sinonime të atyre qe po merrnin pjesë në zgjedhje dhe institucione; pak e dinë, por duhet ta dinë të gjithë, se Albin Kurti deri në vitin 2009, kur po përgatitej ta bënte kthesën e parë drejt pushtetit, pra, kur ai po përgatitej t’i njihte institucionet dhe të merrte pjesë në zgjedhje, ka qenë kategorik kundër bashkimit kombëtar; ai “e pati shumë të vështirë” ta njihte edhe shpalljen e pavarësisë!

Të gjitha këto, dhe shumë të tjera, Albini, Fusheja ynë, ky makiavelist që nuk la mjet pa përdorë për arritjen e qëllimeve të veta, i keqpërdori për të hyrë në lojën e madhe për karrierë e pushtet.

Tani Albin Kurtit nuk ka çka i duhet, madje i është bërë pengesë antiimperializmi, revolucionariteti e patriotizmi adoleshent! Ai tani kërkon partneritet me ndërkombëtarët; ai tani nuk i flak dhe nuk i përbuz mbështetësit e Pakos së Ahtisarit dhe nënshkruesit e Rambujesë; ai tani kërkon t’i udhëheqë bisedimet me Serbinë, e jo t’i fillojë ato me Shqipërinë (sic!). Ai tani ka hyrë në lojën e tij të madhe!

Veprimet e tij të fundit, kur atij iu bë e qartë se me këtë përbërje të partisë së tij, me kursin kombëtar dhe antiimperialist të LVV-së, nuk mund t’i arrijë dy gjëra: ta ketë mbështetjen e faktorit ndërkombëtar dhe t’i fitojë zgjedhjet, kushte të cilat “janë të domosdoshme” për ta marrë pushtetin në Kosovë, ai, Fusheja i ditëve tona, vlerësoi se ka ardhur momenti për kthesën e re: ta lë anash luftën për bashkim kombëtar, ta lë anash luftën kundër Pakos së Ahtisarit dhe nënshkruesve të tij, t’i lë anash të gjitha “parimet” dhe  qëndrimet e tij të mëhershme dhe të hyjë në lojën e madhe, në vorbullën e politikanëve pretendues për kryeministër të Kosovës.

Në ditët në vijim do të shohim shumë dorëheqje e largime nga LVV-ja. Albini u gëzohet fshehurazi shumë këtyre largimeve, sepse kjo ia hap rrugën për aktivizimin e strukturës që ai e ka përgatitur gjatë - strukturës tjetër të LVV-së me njerëz pa parime dhe me njerëz të uritur për pushtet. Kushti i vetëm për ta do të jetë kundërshtimi i Hashim Thaçit, të cilin ai e sheh si të vetmen pengesë për realizimin e qëllimeve të veta karrieriste.