Vazhdojnë aktivitet për shënimin e Ditës Ndërkombëtare të Tokës
Shënimi i kësaj dite më rendësi të veçantë për mjedisin do të mbahet sot për arsye se 22 Prilli është festë shtetërore - ditë pushimi, në hapësirën e Qendrës “Pylli i Arinjve”, Prishtinë.
Edhe Universiteti i Prishtinës “Hasan Prishtina”, i mbështetur nga Let's Do It Kosova, Venture UP dhe Komuna e Prishtinës, do të organizojë aktivitete për shënimin e kësaj dite në hapësirën e kampusit të UP-së.
Nën moton “Gjelbëro UP-në”, përmes kësaj iniciative do të këtë pastrim, mbjellje të drunjve dhe të fidanëve në kampus.
Edhe Instituti Kosovar për Qeverisje Lokale organizon po sot diskutimin publik me temën “Politikat e Ambientit në Nivel Lokal”.
Ngjarja përkon me Ditën Ndërkombëtare të Tokës dhe për synim ka diskutimin për mundësitë e bashkëpunimit në funksion të avancimit të politikave të mjedisit në përputhje me objektivat dhe përgjegjësitë që dalin nga Strategjia për Mbrojtje të Mjedisit.
Pjesëmarrës në takim do të jenë Ministri i Mjedisit dhe Planifikimit Hapësinor, Fatmir Matoshi; Zëdhënësja e Qeverisë së Republikës së Kosovës, znj. Donjeta Gashi; Drejtorë të Drejtorive të Shërbimeve Publike nga niveli lokal, përfaqësues nga organizatat partnere ndërkombëtare dhe shoqërisë civile.
