Pejë, 15 mars - Drejtoria Rajonale e Policisë së Kosovës në Pejë ka njoftuar se Stacioni Policor në Klinë, duke u bazuar në planin operativ ‘Marrja e masave ligjore kundër transportuesve ilegalë të masës së drurit’, ka ndërmarrë një operacion policor në zonë të komunës së Klinës, me qëllim të mbrojtjes së pyjeve, të cilat janë duke u prerë dhe duke u transportuar në mënyrë ilegale nga persona të ndryshëm.

Lidhur me këtë është njoftuar Inspektorati Komunal si dhe Drejtoria për Bujqësi dhe Pylltari pranë Kuvendit Komunal Klinë dhe së bashku ka filluar implementimi i planit.

Gjatë zbatimit të këtij plani Policia e Kosovës në këtë zonë ka ndaluar 7 (shtatë) mjete transportuese, të cilat kanë qenë duke transportuar masë drunore pa dokumentacion përkatës.

Në bashkëpunim me inspektorët e tregut, me zyrtarët për bujqësi dhe pylltari, masa drunore është konfiskuar me urdhër të prokurorit të shtetit dhe ndaj të dyshuarve janë iniciuar rastet ‘transport ilegal i druve’ dhe janë ndërmarrë masat adekuate ligjore.