Mitrovicë, 30 korrik - Ka përfunduar me sukses fushata e korrje-shirjeve në territorin e Komunës së Mitrovicës. Zyrtarët e Drejtorisë për Bujqësi dhe Zhvillim Rural (DBZHR) thonë se rendimentet e grurit kanë qenë më të vogla krahasuar me  vitin e kaluar për shkak te kushteve agroekologjike.

Drejtori i kësaj drejtorie, Bislim Imeri, tha se përkundër disa problemeve të vogla,  këtë vit korrje-shirja ka qenë e suksesshme.

“Drejtoria e  Bujqësisë dhe Zhvillimit Rural   së bashku me Komisionin Komunal për fushatën e korrje-shirjeve të drithërave të bardha, vazhdimisht kanë qenë në terren  duke u njoftuar me vështirësitë dhe problemet  e fermerëve dhe autokombajnerëve që ballafaqoheshin në realizimin e procesit të korrje-shirjes, njëkohësisht duke ju ofruar mbështetje profesionale për zgjedhjen e problemeve dhe vështirësive të ndryshme”.

Ai tha se në Komunën e Mitrovicës këtë vit  kanë qenë të kultivuara gjithsej 930 ha grurë, 800 ha tërshërë dhe 45 ha elb. “Korrje-shirjet kanë filluar me datën  06.07.2012 dhe kanë vazhduar deri me datën 25.07. 2012”.
 
Drejtori Imeri, theksoi se procesi i korrje-shirjes përkundër disa problemeve të vogla është realizuar ashtu siç është hartuar dhe planifikuar nga Drejtoria e Bujqësisë dhe MBPZHR.
“Është e rëndësishme të theksohet se në fillim me korrje kanë startuar 10 autokombajna, kurse më vonë numri i tyre është  rritur në 20 sosh”.

Ai tha se në bazë të dhënave nga terreni dhe  analizave rendimenti mesatar në këtë vit ka qenë: 4000 kg/ha grurë, 2100  kg/ha tërshërë dhe  2400 kg/ha elb.

“Për përfundim të suksesshëm të korrje-shirjeve përkundër kushteve agroekologjike  kanë ndikuar disa faktorë: Ardhja e një numri të madh të autokombajnave nga komunat tjera, mandej puna në terren e komisionit komunal dhe Drejtorisë së Bujqësisë dhe Zhvillimit Rural si dhe  subvencionimi i MBPZHR  për autokombajna me  25% më lirë për litër të naftës”.