Prishtinë, 16 shtator - Ministri i Bujqësisë, Pylltarisë dhe Zhvillimit Rural (MBPZHR), Memli Krasniqi ka deklaruar se nga nesër fillon vaksinimi i gjedheve për shkak të përhapjes se sëmundjes gungore të lëkurës.

\"Sot u njoftova nga Agjencia e Ushqimit dhe Veterinarisë së i gjithë kontingjenti i vaksinave kundër sëmundjes gungore të lëkurës së gjedheve është shpërndarë në gjithë territorin e vendit dhe që nga nesër do të fillojë vaksinimi. Pa dyshim ky është një lajm të mirë për të gjithë ata që mbajnë gjedhe, sepse me këtë do të parandalohet përhapja e mëtejmë e kësaj sëmundje që ka prekur të gjitha vendet e rajonit\", ka shkruar ai në Facebook.

Ai ka siguruar edhe një herë se të gjithë ata që kanë pësuar humbje nga fondi i gjedheve nga kjo sëmundje do të kompensohen nga fondi që ka ndarë ditë me parë Qeveria e Kosovës.

\"Ne do të jemi në koordinim të vazhdueshëm edhe me AUVK-në që të nisë së shpejti edhe procesi i verifikimit të ngordhjeve dhe menjëherë të bëhet edhe kompensimi.
Dua të falënderoj të gjithë ata që kanë ndihmuar që kjo sfidë të tejkalohet lehtë, duke evituar pasojat më të mëdha\", ka thënë ai.