Prishtinë, 7 prill - Tregu i Kosovës që nga paslufta është vërshuar nga qumështi i dyshimtë dhe produktet e qumështit pluhur.

Sipas të dhënave të OJQ-së “Konsumatori”, sasia vjetore e qumështit pluhur, që importohet nga bizneset vendore, është rreth 16 mijë tonelata.

Dyshohet se importi bëhet edhe nga vende me radioaktivitet të lartë që për pasojë e bën të rrezikshëm për shëndetin qumështin pluhur.

Por, autoritetet kosovare hezitojnë të japin informacione për shqetësimet e ngritura nga “konsumatori”.

Zyrtarët e Doganave të Kosovës dhe të AVUK-ut për dy ditë me radhë nuk kanë dhënë përgjigje në çështjet e ngritura nga gazeta në lidhje me sasinë që po importohet dhe të dhënat që duhet t’i kenë këto institucione

/Kosova Sot/