Prishtinë, 7 korrik - Me rastin e fillimit të aktiviteteve të korrje-shirjeve, Ministria e Bujqësisë , Pylltarisë dhe Zhvillimit Rural (MBPZhR) dhe Qeveria e Republikës së Kosovës kanë ndarë 500.000€ për subvencionimin e derivateve të naftës, me qëllim që çmimi i korrje-shirjeve të jetë më i lirë dhe unik në tërë territorin e Kosovës.

Në bashkëpunim me zyret regjionale dhe drejtoritë përkatëse komunale janë bërë të gjitha përgatitjet e duhura për realizimin e suksesshëm të aktiviteteve të korrje-shirjeve, si dhe për përcjelljen dhe monitorimin e tyre.

Duke ju uruar prodhuesve korrje të bollshme dhe kombanjerëve punë të mbarë, MBPZhR-ja rithekson që edhe në të ardhmen do t’i mbështesë nëpërmjet subvencionimit dhe politikave strategjike të zhvillimit, dhe do të bëhet krah i punës për rritjen e mirëqenies së banorëve, sidomos në zonat rurale.