Gjermania mbështet promovimin e verërave kosovare në tregjet evropiane
Me këtë rast, do të nënshkruhet edhe një marrëveshje mes MBPZhR-së dhe Qeverisë Gjermane, ku kjo e fundit përmes projektit “Rritja e konkurrueshmërisë së sektorit privat”, i implementuar nga organizata e Qeverisë Gjermane GIZ, e financuar nga Ministria Federale Gjermane për Zhvillim Ekonomik, do të ndihmojë ministrinë në hartimin e strategjisë kombëtare për sektorin e vreshtarisë dhe verëtarisë, si dhe do të mbështes promovimin e verërave kosovare në tregjet evropiane.
Projekti ,,Rritja e konkurueshmërisë së sektorit privat në zonat rurale’’, që implementohet nga Deutsche Gesellschaft für Internationale Zusammenarbeit (GIZ) e financuar nga Ministria Federale Gjermane për Bashkëpunim Ekonomik dhe Zhvillim (BMZ) është duke përkrahur sektorin e verës në Kosovë.
Në prani të ambasadores gjermane Znj. Angelika Viets, Ministri i Bujqësisë, Pylltarisë dhe Zhvillimit Rural Z.Memli Krasniqi, Drejtori GIZ në Kosovë James Macbeth Forbes, drejtori i shoqatës së verës Enologjia Nevzat Haxhijaha dhe presidenti i shoqatës së prodhuesve të rrushit Afrim Sharku, do nënshkruajnë një marrëveshje mirëkuptimi.
Me këtë marrëveshje mirëkuptimi palët nënshkruese pajtohen për bashkëpunim në zhvillim të strategjisë për sektorin e verës, për konceptin e marketingut dhe aktivitete promovuese dedikuar tregjeve lokale, rajonale dhe të BE-s, si dhe adaptimin e kornizës ligjore sipas Acquis Communautaire.
